ارد شیر بابکاں
اردشیر بابکاں یاں اردشیر اول (226ء -240ء) ایران دی مشہور ساسانی سلطنت دا بانی سی ۔ پہلاں ایہہ فارس دا راجہ سی تے اشکانی ( پارتھیا دے ) بادشاہ دی اطاعت توں انکار کیتا تے برنر دے مقام تے اسنوں ہرا کے ایران دا بادشاہ بن گئیا ۔ اس نے پنجاب دے سارے علاقے تے مل مار کے اسنوں اپنی سلطنت چ شامل کر لئیا ۔ قیصر روم دیاں فوجاں نوں شکست دے کے آرمینیا تے وی مل مار لئیا ۔ اردشیر نے زرتشتی مذہب جہڑا کہ اشکانیاں دے دور ج کمزور ہوئیا سی نوں دوبارہ اتے چکیا ۔ پارسی موبداں تے دستوراں ( مذہبی آگوآں) نوں جاگیراں دتیاں تے آتش کدےآں نوں فیر روشن کیتا ۔ اس نے فوج چ اصلاحاں کیتیاں تے عدل تے انصاف لئی کوششاں کیتیاں ۔ اردشیر بابکاں دا قول سی باقاعدہ فوج دے بغیر حکومت ممکن نئیں ، روپئیے دے بغیر فوج ممکن نئیں ، زراعت دے بغیر روپئیہ ممکن نئیں تے عدل تے انصاف دے بغیر زراعت ممکن نئیں ۔