جرمن شیفرڈ

آزاد انسائیکلوپیڈیا، وکیپیڈیا توں
(السشن توں مڑجوڑ)
السشن - بگیاڑی - جرمن شیفرڈ
جرمن شیفرڈ
دیس : جرمنی
جوکھ : نر 30–40 کلوگرام
مادہ 22–32 کلوگرام[۱]
قد : نر 60–65 سینٹی میٹر (24–26 انچ)
مادہ 53–60 سینٹی میٹر (21–24 انچ)[۱]
رنگ: کاٹھی کالی ریندا سیتا، کالا چٹا
جیون ورے: 9 - 13 [۲]

جرمن شیفرڈ (جرمن:Deutscher Schäferhund) وڈے ناپ دے کتیاں دی اک نسل اے جیہڑی جرمنی توں چلی۔ ایہنوں السشن وی کیندے نیں۔ ایھدے مڈ دی تریخ 1899 منی گئی اے۔ ایہ اک کمی کتا اے جیہڑا پیڈاں دی راکھی تے پلس دے کماں وچ کم آندا اے۔ اپنی سیانف، زور تے چاکری باجوں ایہ دنیا دا اک ودیا تے پسند کیتا جان والا کتا اے۔ پالے جانوالے کتیاں وچ امریکہ وچ ایہ دوجے نمبر تے اے تے برطانیہ وج چوتھے نمبر تے۔

ناں[سودھو]

ایس کتے دا جرمن ناں ایہدے موڈی سٹیفانز نے ڈوئچر شافرہنڈ (Deutscher Schäferhund) رکھیا سی یعنی جرمن آجڑی کتا۔ جرمن شیفرڈ ایہدا عام انگریزی ناں اے پر پہلی وڈی لڑائی وچ انگریزاں نے جرمناں نال ویر باجوں ایدا ناں پلٹ کے السشن رکھ دتا۔ السیشن ناں جرمنی تے فیر فرانس دے صوبے السائس توں پیا اے۔ 2012 وچ ایدا ناں ایدے اصل ول پلٹایا گیا اے۔ ایہنوں پنجابی وج بگیاڑی کتا وی کیندے نیں۔

تریخ[سودھو]

میکس فان سٹیفانثز، جرمن شیفرڈ کتے دی نسل نوں بنانوالہ، اک جرمن سی۔اوہ اک گھڑ سوار، برلن وٹنری کالج دا پڑھاکو تے فیلیکس سوسائٹی دا سنگی سی۔ ایہ سوسائٹی جرمنی وچ کتیاں نوں اک پدھر تے بنان لئی بنائی گئی سی۔ میکس اک کمی نسل دا کتا چاہندا سی پر اوہنوں دیسی جرمن نسلاں وچ ایسا کوئی کتا ناں دسیا۔ 1899 میکس اک کتا نمیش وچ سی جتھے اوہنوں اک کتا جیدا ناں ہیکٹر لنکسرہائن سی وکھایا گیا۔ ہیکٹر بڑے جر توں ایس اچیچی نسل نوں بنانوالے کم دا انت سی تے میکس دے خیال وچ اک کامے کتے وچ جو ہونا چاہیدا اے اوہ ہیکٹر وچ ہے سی۔ اوہ کتے دی طاقت، وفاداری، سہنپ تے سیانف توں اینا متاثر ہویا جے اوہنے ایس کتے نوں کھڑے کھلوتے ای ملیں لے لیا۔ لین مگروں اوہنے اوہدا ناں بدل کے ہورانڈ فان گرافراتھ رکھیا تے جرمن شیفرڈ کتیاں دی سنگت دے ناں تے کتیاں دی اک سنگت بنائی۔ ہورانڈ نوں پہلا جرمن شیفرڈ کتا منیا گیا تے سنگت دی نسل کتاب وچ پہلا کتا۔ ایس کتے توں فیر ہور کتے جماۓ گۓ۔

وکھالہ[سودھو]

ایہ اک وڈے ناپ دا کتا اے۔ نر 60–65 سینٹی میٹر (24–26 انچ) اچا جد کے مادھ 53–60 سینٹی میٹر (21–24 انچ) اچی ہوندی اے۔ |نر 30–40 کلوگرام تے مادہ 22–32 کلوگرام پآر دی ہوندی اے۔ سر گمبد ورگا، تھوتھنی لمی، مربع تے کالی ہوندی اے۔ اکھاں پؤریاں تے مدرے ناپ دیاں جنہاں وچوں کانفیڈنس تے سیانف دسدی اے۔ کن سدھے آکڑے تے برابر تے اگے نوں کھلدے۔ ٹردیاں ایہ پچھے ول وی ہو سکدے نیں۔ پوچھل چاڑی ورگی تے ادیاں لتاں تک اپڑدی اے۔

ایہناں دے کئی رنگ ہوندے نیں۔ کاٹھی کالی تے ریندا پؤرا ہوندا اے۔ ایہ سارے کالے تے سارے چٹے وی ہوندے نیں۔ کالے تے پؤرے عام پدھر تے منے گۓ نیں جد کے چٹے نئیں منے جاندے۔ ایہدا کوٹ دوہرا ہوندا اے. کوٹ لما تے مدرا ہوسکدا اے۔

جرمن شیفرڈ
جرمن شیفرڈ دا مونہہ ترکھا کتا کھڑا ہویا

سیانف[سودھو]

جرمن شیفرڈ اک سیانا کتا اے تے ایسے باہجوں پالیا جاندا اے۔ ایہناں دی مانتا طاقت دے نال ایس صفت وچ اے۔ کتیاں تے لکھی کتاب ( The Intelligence of Dogs) دے لکھارے سٹینلے کورن نیں ایس کتے نوں سیانف وچ باڈر کولی تے پوڈل مگروں تیجے نمبر تے رکھیا اے۔ اوہنے ایہ گل پتہ کیتی جے ایہ کتا کسے کم نوں 5 واری کرن تے ای سکھ جاندا اے تے 95٪ واری اینج ہویا جے پہلے کہن تے گل من جاندا اے۔ ایہدی طاقت تے ایہدیاں صفتاں ایہنوں پولیس، راکھی، کھوج تے بچا دے کماں لئی کمدا کتا بناندیاں نیں۔

جرمن شیفرڈ دے وکھالے
کالا چٹا تردیاں ہویاں

ورتن[سودھو]

ایہ بنایا تے اک آجڑی کتا سے پر ایس کم وچ ایہ گھٹ ای پایا گیا۔ اجڑ راکھی وچ ایہ تیز تے سیانا اے۔ فوج کسٹم تے پولیس وچ ایہ اک کمی کتا اے۔ ایہ بچاؤ دے کماں وچ وی کم آندا اے۔ اک حساب وچ 80٪ جرمن پلس کتے بگیاڑی نیں۔ ایہنوں دنیا وچ سب توں ود بچاؤ تے کمی کتا منیا گیا اے۔ فوج وچ ایہنوں پراشوٹ توں وی سٹیا گیا تے ٹینک دے خلاف وی ورتیا گیا اے۔ ایہ اگمان کتے لئی وی ورتے جاندے نیں۔

لڑاکا[سودھو]

چنگے سکھاۓ گۓ تے لوک رلے کتے خطرہ نہیں ہوندے پر جرمن شیفرڈ اک لڑاکا کتا اے تے ایہنوں گھر وچ پالنا رکھنا کدے کدے رپھڑ پادندا اے۔ امریکہ وچ کڈی گئی اک کاہڈ وچ ایہ ویکھیا گیا جے نکے کتیاں تے انساناں تے ہلہ بولن وچ جرمن شیفرڈ سب توں اگے سن۔ نیشنل جیوگرافک چینل دی کھوج وچ ایہدے چک دی طاقت روٹویلر نالوں ودھ سی۔

مزاج[سودھو]

جرمن شیفرڈ اک تیز، پھرتیلا تے اپنے آپ تے اعتماد رکھنوالا کتا اے۔ ایہ سکھن وچ ترکھا تے کم کرن لئی ہر ویلے تیار ریندا اے۔ ایہناں وچ کھوجن دی حس تیز ہوندی اے تے ایسے باہجوں ایہ راکھی تے بچاؤ دے کماں وج ودھیا منے گۓ نیں۔ ایہ اپنی تھاں دی ودھیا راکھی کردے نیں تے نویں لوکاں نال چھیتی یاری نہیں لاندے۔ ایہ بہت سیانے تے تابیدار ہوندے نیں۔

رہتل وچ[سودھو]

ایہ کتا عمران خان کول وی ہے جیہنوں ایہ پرویز مشرف نے دتا سی۔ ہٹلر کول وی ایہو ای سی۔

  • چنگے گھراں دے کتے وی سیانپے جاندے نیں۔ پنجابی اکھان

ہور ویکھو[سودھو]

بارلے جوڑ[سودھو]

اتہ پتہ[سودھو]

  1. ۱.۰ ۱.۱ USA German Shepherd Dog Standard". United Schutzhund Clubs of America. Retrieved 20 July 2008
  2. O'Neill et al., (2012). "Longevity of UK Dog Breeds". Royal Veterinary College, University of London. Retrieved 18 January 2013.