السلام علیکم
السلام علیکم (As-salamu alaykum) عربی الفاظ نیں، ایہدا مطلب اے "تھواڈے اُتے سلامتی ہووے"۔ مُسلمان اک دُوسرے نُوں مِݪدے یا رُخصت کردے وقت سلام کردے نیں۔ دُنِیا بَھر دے مُسلماناں لئی السلام علیکم اک مذہبی چلن بݨ گیا حالان٘کہ دِین اسلام دی آمد توں پہلاں وی عربی بولݨ واݪے لوک بشمُول عرب یہودی تے عرب عیسائی بطَور سلام السلام علیکم کہن٘دے سی۔
سلام اسماء الحسنی یعݨی اللہ دا صفاتی ناں وی اے۔ سلام دا مترادف سلامتہ اے تے بَعض نے سلامتہ دی جمَع سلام دسّی اے۔
سلام تسلیم دا اسم اے تے شریعت دی اصطلاح وچ ایس توں مراد دو یا دو توں زیادہ مُسلماناں دی آپس وچ مِݪدے وقت دی دعا اے۔ السلام علیکم دا جواب وعلیکم السلام اے۔ سلام کرن والا تے جواب دیݨ واݪا دونے و رحمۃ اللہ و برکاتُہُ دے کلمات دا اضافہ وی کر سکدے نيں۔
سلام دے آداب
[سودھو]- سلام کہݨ والا السلام علیکم کہوے، چاہے مخاطب اک ہووے یا زیادہ لوک ہوݨ۔ جے مخاطب اک ہووے تاں السلام علیک وی کہیا جا سکدا اے۔
- السلام علیکم و رحمۃ اللہ و برکاتُہُ (عربی: ٱلسَّلَامُ عَلَيْكُمْ وَرَحْمَةُ ٱللَّٰهِ وَبَرَكَاتُهُ) کہݨا وی درُست اے، جواب لئی وَ علیکم السلام و رحمۃ اللہ و برکاتُہُ (عربی: وَعَلَيْكُمُ ٱلسَّلَامُ وَرَحْمَةُ ٱللَّٰهِ وَبَرَكَاتُهُ)۔
- سلام دا جواب ایس توں بہتر تے عُمدہ طریقے ناݪ دیݨا مستحب اے۔
- سلام دا جواب دیݨا واجب اے کیون٘کہ ایہدا حُکم قرآن مجید وچ اے سورۃ النساء آیت نمبر 86 :
(عربی: وَإِذَا حُيِّيتُم بِتَحِيَّةٍۢ فَحَيُّوا۟ بِأَحْسَنَ مِنْهَآ أَوْ رُدُّوهَآ ۗ إِنَّ ٱللَّهَ كَانَ عَلَىٰ كُلِّ شَىْءٍ حَسِيبًا 〇)
ترجمہ: تے جَد تھوانُوں سلام کہیا جاوے تاں بہتر سلام یا گَھٹو گَھٹ ایسے طرحاں جواب دوࣥو۔ بے شک اللہ ہَر شَے دا حساب لَیݨ واݪا اے۔
سلام دی اہمیت تے فائدے
[سودھو]اسلام وچ سلام دی تاکِید اے۔ ایہ باہمی تعارف دا نُقطہ آغاز اے جیہڑا اجنبیئت نُوں دُور کرن تے محبّت و یگانگت دے جذبات نُوں فروغ دیݨ دا باعث بَݨدا اے۔ ادنا تے اعلا دے فرق نُوں مٹا کے اہلࣦ اسلام وچ ایس احساس نُوں اجاگر کردا اے کہ سَبھ مسلمان اک ہی برادری ناݪ وابستہ نيں۔