بحیرہ ارال

Wikipedia توں
جاو: مدد, کھوج
ارال

بحیرہ ارال وسطی ایشیا دی اک جھیل اے جہڑی ازبکستان تے قازقستان دے وچکار واقع اے ۔ اس دے چارے پاسے زمین اے پر اپنے اینے وڈے رقبہ دی وجہ توں اسنوں سمندر آکھیا جاندا اے ۔ اسلامی تريخ چ اسنوں بحیرہ خوارزم دے ناں نال جانیا جاندا اے ۔ اس جھیل دا ناں "ارال دینغز " توں نکلیا اے ، جہڑا کہ کرغیز بولی دا لفظ اے جس دا مطلب "جزیریاں دا سمندر " اے ۔ 1960ء دی دہائی توں اس جھیل دے پانی چ مسلسل کمی واقع ہورہی اے ، جس دی وجہ اس چ ڈگن والے 2 اہم دریا سر دریا تے آمو دریا توں نہراں کڈ کے اینہاں دے پانی دا زراعت لئي وڈے پیمانے تے استعمال اے ۔ اینج کرن نال جھیل چ پانی دے زرائع بہت ای گھٹ گئے تے دن بدن کیہہ سکڑدی چلی گئی تے گھٹ پانی وی شدید گرمی نال چھیتی بخارات چ تبدیل ہورہی اے ۔ بحیرہ ارال جہڑا کسے زمانے چ دنیا دی چوتھی سب توں وڈی جھیل سی ، ہن 8ویں نمبر تے اے ۔ بحیرہ ارال رقبہ ہن 1960ء دے مقابلے چ صرف 40 فیصد رہ گئیا اے ۔

ہن جگ دی توجہ دے بعد اس قدرتی ورثے دی حفاظت دا منصوبہ تشکیل دتا گئیا اے ، پر اس نال وی جھیل دے حجم چ کوئی خاص وادھا دیکھن چ نئيں آئیا ۔ اس توں علاوہ جھیل انتہائی آلودہ وی اے ، جسدی وجہ سویت دور چ تے اس دے بعد ہتھیاراں دے تجربے ، صنعتی منصوبے تے کھاد سازی دی صنعت اے ۔


تریخ[لکھو]

ولادیمیر لینن نے بالشویک حکومت دے دوران 1918ء چ فیصلہ کیتا کہ آمو دریا تے سر دریا ، جہڑے کہ بحیرہ ارال دی زندگی دا سبب نیں ، دے پانی نوں صحراواں نوں سیراب کرن لئي استعمال کیتا جاوے تاکہ چول ، ہدوانے متیرے ، اناج تے کپاہ دی کاشت نوںودھائیاجاسکے۔