سوہن حلوہ
| سوہن حلوہ Sohan halwa | |
|---|---|
 سوہن حلوہ | |
| سروت | |
| متعلق دیس | پنجاب، پاکستان |
| علاقہ | ملتان |
| کاڈھکار | سوہن حلوائی |
| کھانے دا ویروا | |
| مکھ سامان | آٹا چینی، ددھ |
سوہن حلوہ (Sohan halwa)، حلوے یا مٹھیائی دی اک قِسم اے جیہدی اِبتداء پنجاب، پاکستان دے شہر ملتان توں ہوئی۔ ہُݨ ایہ پاکستان توں علاوہ بھارت وچ وی بݨایا جاندا اے۔
ایہنوں پاݨی، چینی، دودھ تے آٹے دے آمیزے نوں گھے ناݪ بُھنّ کے بݨایا جاندا اے جد تک کہ ایہ ٹھوس نہ ہو جاوے۔ ذائقے لئی زعفران، پستا تے لیچی وی پائی جاندی اے۔ جنوبی ایشیا وچ حلوے دے دیگر پکواناں دے برعکس، ایہ ٹھوس اے۔
پچھوکّڑ[سودھو]
ایہ خاص قِسم دا حلوہ اے جیہنوں ملتانی سوہن حلوہ وی کہیا جاندا اے۔ پہلی بار سوہن نے تیار کیتا سی۔ سوہن ملتان دا ایک ہندو حلوائی سی۔ اک دن مٹھائی لئی منگوایا گیا دُدھ پھٹ گیا تے دُدھ نوں ضائع کرن دی بجائے سوہن نے تجرباتی طور تے کڑاہی وچ پا کے اَگ اُتے رکھ دِتا۔ جِدّاں جِدّاں دُدھ گاڑھا ہُندا گیا، سوہن ایہدے وچ کڑچھا ہلاؤندا رہیا۔ دُدھ نوں ہور گاڑھا کرن لئی سوہن نے ایہدے وچ کݨک دے آٹّے دی کُچھ مقدار وی شامل کر دِتی۔ جد سوہن نے ایہنوں چکھیا تاں اس منفرد مٹھیائی دا ذائقہ اوہنوں بہت لذیذ لگیا۔ اوہنے راہ جاندے لوکاں نوں نویں مٹھیائی ونڈݨی شروع کر دِتی۔ سوہن نے اتفاقن بݨ جاݨ آݪی ایہ مٹھیائی اس وقت باقاعدہ طور تے بݨاؤݨا شروع کر دِتی جد لوک آکے اوہدے کوݪوں اوہی حلوہ دوبارہ منگݨ لگ گئے۔ سوہن دا حلوہ چند دِناں وچ شہر بَھر وچ مشہور ہوگیا۔ مہاراجا رنجیت سنگھ دے متعین کردہ ملتان دے حاکم دیوان ساون مل دے دربار وچ حاضر ہو کے سوہن نے ایہ نویں سوغات پیش کیتی، دیوان ساون مل اوہدی پسندیدگی توں بعد اس مٹھیائی دی طلب ہور زیادہ وَدھ گئی۔