فِکشن
فِکشن (Fiction) ادبی تخلیقی کَم اے جیہڑا کہاݨی اُتے استوار ہووے، جس وچ افراد، واقعات، یا جگہاں دی تصوِیر کشی کیتی جان٘دی اے۔ فِکشن لاطینی زبان دا لفظ اے جیہدا لغوی مطلب تخیل دے ذِریعے تخلیق کردہ ادب اے، جیہنوں افسانوی ادب وی کہیا جان٘دا اے۔ فِکشن وچ ناول، ناولٹ، افسانہ، افسانچہ شامل نیں۔ تاہم، زیادہ وسیع طور اُتے فِکشن کِسے وی میڈیئم وچ اظہار خیالی قِصّے کہاݨیاں اُپر مُشتمل ہُن٘دا اے، جس وچ نہ صرف تحریراں بلکہ لائیو تھیٹر پرفارمنس، فِلماں، ٹیلی ویژن ڈرامے، ریڈیو ڈرامے، کردار ادا کرن آݪی گیمز تے ویڈیو گیمز وی شامل نیں۔
ادبی اصطلاح وچ فِکشن کہاݨی دا نام اے جیہدے وچ فرضی کرداراں تے فرضی واقعات دے ذِریعے ایہجئی تصوِیر پیش کیتی جان٘دی اے جیہڑی پڑھݨہاراں دے شعُور نوں متاثر کردی اے تے اوہناں نوں خُشی دیندی اے۔ فِکشن وچ ضرُوری نئیں کہ ایہدا ہر کردار یا واقعہ فرضی ہووے، بلکہ ایہدے وچ اصلی واقعات وی بیان ہوسکدے نیں۔ فِکشن نگار اپݨی تخلیقات نوں متاثر کُن تے دلچسپ بݨاؤݨ لئی اوہناں وچ تجسّس تے کہاݨیئت دا رَن٘گ پَیدا کردا اے۔