منور حسین چشتی

منور حسین چشتی
پنجابی دے شاعر
جمن پو	سعیلہ ضلع جیلم پاکستان
جمن دیاڑہ	22 اگست 1955

منور حسین چشتی پنجابی دے شاعر نیں۔اوہ ضلع جیلم دے گراں سعیلہ دی واسی نیں۔ گورنمنٹ ہائی سکول جیلم تے ڈگری کالج جیلم توں پڑھن دے مگروں اوہ سرکاری ملازم ہوگۓ۔ 1991 چ اوناں دا ویاہ ہویا تے اوناں دیاں تن تعیاں تے اک پتر اے۔‎

منور حسین چشتی دی شاعری عام بندے دیاں سوچاں نوں دسدی اے۔ پنجابی رہتل اوناں دی شاعری چ ٹردی پھردی دسدی اے۔ تے اک ہور پنجابی شاعر انور مسعود نوں سوچاں چ لیاندی اے۔

پنجابی چ نظماں دے نال نال اوناں نعتاں وی لکھیاں تے اوہ چنگے نعت پڑھن والیاں چ گنے جاندے نیں۔

نظماں

• ماں
• بیوی
• ویاہ
• پگ نوں داغ ناں لائیں تعیے۔

منور جی دی اک نظم ماں تھلے دتی گئی اے (اے نظم اوناں پنجابی وکیپیڈیا دے ناں کر دتی اے۔)

ماں

کڈے لاڈ لڈاوے ماں
صدقے واری جاوے ماں
آپوں کھاوے رکھی سکھی
مینوں ددھ پلاوے ماں
آپوں تپ وچ سڑدی ریندی
مینوں چھاویں پاوے ماں
ٹھنڈ وچ سوندی گلے پاسے
مینوں سکے پاوے ماں
کچی نیندر ہوسی اس دی
ستیاں ناں جگاوے ماں
جتھے میرا مڑکا ڈلے
اوتھے رت وگاۓ ماں
کنڈ ہو جاندی اس دی خالی
جس دی وی مر جاوے ماں
جے وس چلدا مرن نہ دیندی
ہاڑے ترلے پاوے ماں
پتر پاویں پیڑے ہوون
سو سو پردے پاوے ماں
رحمت دے کھل جان خزانے
جدوں ھتھ اٹھاوے ماں
جس منور رب نوں منانا
اپنی او مناوے ماں