مکھی کھانا

آزاد انسائیکلوپیڈیا، وکیپیڈیا توں
مکھی کھانا
دیس : جنور
برادری : کورڈیٹ
ٹولی : پنچھی
ٹبر: مکھی کھانا
ٹوکرہ: 3
ونڈاں: 28

مکھی کھانا مدرے ناپ دے پنچھیاں دے اک ٹبر دا ناں اے۔ ایہ ایشیاء, افریقہ, نیوگنی تے آسٹریلیا دے واسی نیں۔ ایہناں دے رنگلے پر، پتلے پنڈے تے لمی وشکارلی پوچھل ہوندی اے۔ ایہناں دی تھلے ول مڑی چنج تے چنجلے پر ہوندے نیں۔ ایہنوں ہری چڑی وی کیا جاندا اے۔

ایہناں دا ناں مکھی کھانا ایہناں دے اڈدے کیڑیاں تے اچیچیا ماکھیو دیاں مکھیاں تے تموڑیاں شکار کرکے کھان باہجوں رکھیا گیا اے۔

وکھالہ[سودھو]

سارے مکھی کھانیاں دیاں ونڈاں دی شکل اکو جئی ہوندی اے۔ ایہ مچھی ماراں نال رلدے نیں۔ نکی تؤن، رنگلے پر تے نکیاں لتاں ہوندیاں نیں۔ پر گول یا چنجلے ہوندے نیں۔ پر ایہناں دی اڈاری شکار کرن دے ول نال بنے ہوندے نیں۔ چوکھے رکھاں وچ رہن تے شکار کرنوالے مکھی کھانیاں دے پر نکے تے گول ہوندے نیں جد کے کھلے تھانواں تے دور تک مار کرنوالے مکھی کھانیاں دے پر وڈے تے چنجلے ہوندے نیں۔ سارے مکھی کھانے ہوا وچ رہنوالے، اپنی تھاں توں زور لا کے تیزی نال اڈنوالے تے تیزی نال مڑنوالے نیں۔ ایگھٹ ای اک تھان تے رک کے اڈ سکدے نیں۔

مکھی کھانیاں دی چنچ لمی، تھلے ول مڑی تے اگیوں تکھی ہوندی اے۔ چنج زور نال ماردا اے تے چنج نوں قینچی دے دو شکنجیاں لئی ہوا وچ کیڑے پھڑن لئی تے نکے کیڑیاں نوں پھین لئی ورتدا اے۔ لتان نکیاں تے ماڑیاں ہوندیاں نیں تے اوہناں تے ٹرنا بس گزارا ای اے۔

ایس ٹبر دے پنچھیاں دے کھمب تیز رنگاں وچ تے لامت ونڈاں وچ ہرا رنگ چھایا یا چوکھا ہوندا اے۔ ہری چڑی جنس دے لامت پنچھیاں دی اکھ چوں اک کالی لیک بنی دسدی اے۔ کئیآں دے گلے تے منہ وکھرے رنگاں دے ہوندے نیں۔ ایہناں وچ نر مادھ نوں وکھرا دسنا اوکھا اے۔

پسار[سودھو]

مکھی کھانے پرانی دنیا دے واسی نیں تے یورپ توں اسٹریلیا تک ہوندے نیں۔ ایہناں دی پسار دا گڑھ افریقہ اے۔ اک ونڈ یورپی مکھی-کھانا یورپ دا واسی اے۔ اک ونڈ ست رنگا مکھی-کھانا اسٹریلیا دا وسنیک اے جد کے اک ونڈ زیتونی مکھی-کھانا مڈغاسکر دے جزیرہ دا اے (ایہ پر افریقہ وچ وی ہوندا اے)۔ ایہناں دیاں لوڑاں سادھ نیں: اک اچی تھاں جتھے بیٹھ کے شکار نوں تاڑیا جاۓ تے تھلے کچی مٹی جیدے وچ موری کرکے ریا جاسکے۔ ایہناں دا شکار اڈدا تے ہوا وچ ہوندا اے تے ایس لئی ایناں نوں کسے اچیجے بوٹے یا رکھ دی لوڑ نہین ہوندی۔

ویآر[سودھو]

مکھی کھانے رل مل کے رہن والے پنچھی نیں تے ایہناں دے جوڑے ایہنے نیڑے بیٹھے ہوندے نیں کے جڑے لگدے نیں۔ کئی ونڈاں چوچے ناں کڈن ویلے وچ وی کٹھے ریندے نیں۔ عام کسے کھمبے دی تار تے لین بنا کے بیٹھدے نیں۔ ایہ دن دے شکاری نیں۔ کج ونڈاں اگر دور جانا ہووے تے رات نوں وی اڈ لیندیاں نیں۔ مکھی کھانیاں دا دن دا 10٪ حصہ دھپ سیکن یا مٹی وچ پلسیٹے مارن وج لنگدا اے۔

کھان پین

ایہناں دا کھان پین اڈدے کیڑے نیں تے اوہناں دے شکار لئی ایہ کسے اچی تھاں، کسے رکھ دی جوٹی تے یا کسے کھمبے دی تار تے بیٹھدے نیں۔ یورپی مکھی کھانا اپنے شکار نوں 60 میٹر دی پینڈے توں ویکھ لیندا اے۔ کھان پین وچ ماکھیو دی مکھی، پونڈ، سیونکھ، ٹڈے، بیٹل، ڈریکن فلائی اندے نیں۔

چوچے کڈنا

ایہ زمین وچ یا کسی مٹی دی پڑی وج موری کرکے گھر بنا کے اںدے دیندے نیں۔

ونڈاں[سودھو]

بارلے جوڑ[سودھو]