نیٹو

اتلے اوقیانوسی معاہدے دی تنظیم (نیٹو) ، جسنوں اتلا اوقیانوسی اتحاد ، اوقیانوسی اتحاد جاں لہندا اتحاد وی آکھیا جاندا اے ، اک بین القوامی تنظیم اے جیہڑی 4 اپریل 1949ء نوں امریکہ دے راجگڑھ واشنگٹن ڈی سی چ اک معاہدے دے راہیں وجود چ آئی ۔اس دا صدر دفتر بیلجیم دے راجگھر برسلز چ واقع اے ۔

اس دے بانی رکن ملکاں چ امریکہ ، بیلجئم ، نیدرلینڈ ، لکسمبرگ ، فرانس ، برطانیہ ، کینیڈا ، پرتگال ، اٹلی ، ناروے ، ڈنمارک تے آئس لینڈ شامل نیں ۔ تن ورھے مگروں 18 فروری 1952ء چ یونان تے ترکی وی نیٹو وچ شامل ہو گئے ۔

1954ء چ سویت یونین نے تجویز دتی کہ اوہ یورپ چ امن دے قیام لئی نیٹو وچ شمولیت چاہندا اے پر نیٹو دے رکن دیساں نے اسدی مخالفت کیتی ۔

9 مئی 1955ء وچ لہندے جرمنی دی نیٹو اچ شمولیت نوں ناروے دے وزیر خارجہ نے براعظم دی تریخ وچ اک اہم فیصلہ کن موڑ قرار دتا سی ۔ لہندے مغربی جرمنی دی نیٹو وچ شمولیت تے سویت یونین تے اسدے اتحادِیاں دے وچکار 14 مئی 1955ء وچ وارسا پیکٹ معاہدہ طے پائیا ۔

سرد جنگ دے خاتمے دے مگروں 1999ء چ تن کیمونسٹ ملکاں ھنگری ، چیک لوک راج تے پولینڈ نے نیٹو چ شمولیت اختیار کیتی ۔ 29 مارچ 2004ء چ اتلے تے چڑھدے یورپ دے ست ہور دیساں اسٹونیا ، لیتھوانیا ، لیٹویا ، سلوینیا ، سلواکیہ ، بلغاریہ تے رومانیہ نیٹو چ شامل ہوئے تے اپریل 2009ء چ البانیا وی نیٹو چ شامل ہوئیا ۔

اس دے علاوہ نیٹو دی رکنیت دے خواہشمند دیساں چ مقدونیہ ، جارجیا ( گرجستان) تے کروشیا شامل نیں ۔