ٹونی بلیئر

ٹونی بلیئر
Tony Blair
برطانیہ دا سابق وزیراعظم
جمن تریخ :	6 مئی 1953
جنمستھان :	ایڈنبرا,انگلینڈ
راج ویلا :	2 مئی1997 توں 27 جون 2007 تک
پارٹی :	لیبر پارٹی
پیو :	لیو بلیئر
گھر آلی :	چیری بلیئر

ٹونی بلیر برطانیہ دا وزیراعظم سی۔

مُڈھلا جیون

انتھونی چارلس لِنٹن بلیئر اڈنبرا وچ ہیزل اور لِیو بلیئر دے گھر پیدا ہوئے۔ اوہ اپنے ماں پیو دے دوجے پُتر سی۔ اوہناں نے اپنے کُچھ مُڈھلے ورھے آسٹریلیا دے شہر ایڈیلیڈ وچ گزارے جتھے اوہناں دے والد اک یونیورسٹی وچ قنون دی تعلیم دیندے سی۔ اوہناں دا ٹبر پنجاہ دے دہاکے دے چھیکڑ وچ برطانیا واپس آ گیا تے ٹونی بلیئر نے اپنے بچپن دے باقی ورھے ڈرہم وچ گزارے جتھے اوہ کورِسٹر سکول وچ زیر تعلیم رہے۔ بورڈنگ سکول وچ ٹونی بلیئر دے استاد اوہناں نوں اک اِلتی تے باغی مُنڈے دے طور تے جاندے سی۔ اپنے سکول دے زمانے وچ ٹونی بلیئر اک باصلاحیت اداکار دے طور تے وی جانے جاندے سی۔ ٹونی بلیئر دے ہاؤس ماسٹر ایرک اینڈرسن دے مطابق اوہ زندگی نال بھر پور تے رولز نوں ٹیسٹ کرن دے ماہر سی۔ ستاراں ورھیاں دی عمر وچ اوہناں نوں سکول رولز دی مسلسل خلاف ورزی تے سکولوں کڈھے جان دی دھمکی دتی گئی۔ ٹونی بلیئر تِن اے لیولز نال فیلٹس توں فارغ التحصیل ہوئے تے اوہناں نے سینٹ جانز کالج آکسفورڈ وچ قانون دے شعبے وچ داخلہ لیا۔

راک میوزک

1960ء دے دہاکے دے چھیکڑ وچ ٹونی بلیئر باقی گبھروآں ونگوں راک میوزک دے چاہک سی۔ اوہ مِک جیگر دے بہت بڑے فین سی تے خیالاں دی دنیا وچ اوہ اپنے آپ نوں میوزک مینیجر یا پروموٹر دے روپ وچ کامیابیاں حاصل کردا دیکھدے سی۔آکسفورڈ وچ تعلیم شروع کرن توں پہلاں اوہناں نے ازادی دا اک سال لندن وچ گزاریا جتھے اوہ سٹوڈنٹس دے اک راک بینڈ دے مینیجر رہے۔ آکسفورڈ وچ اوہ کُچھ چِر تک اک راک بینڈ اگلی ریومرز دے نال وی منسلک رہے۔

سنجیدہ کماں وچ حصہ

ایہدے نال نال اوہناں نے سنجیدہ کماں کاراں وچ وی بھی حصہ لینا شروع کردتا۔ اوہناں نے کھبے پاسے دی سیاست دے بارے بحث وچ حصہ لینا شروع کر دتا۔ اوہ اپنے مذہبی عقائد دے بارے بہت سنجیدہ سی۔

والدہ دا مرن

اوہ حلے آکسفورڈ وچ ای سی جد اوہناں دی والدہ دا گلے دے کینسر دی وجہ نال انتقال ہو گیا۔ اوس واقعے نے اوہناں دی شخصیت تے ڈونگھا اثر چھڈیا۔

وکالت

ٹونی بلیئر نے آکسفورڈ توں قانون دی ڈگری دوجے درجے وچ حاصل کیتی تے 1976ء وچ ڈیری اِرون دے چیمبروچ ٹرینی بیرسٹر بن گئے۔ ڈیری اِرون ای اوہناں دے پہلے لارڈ چانسلر وی بنے۔

بیاہ

ٹونی بلیئر تے اوہناں دی اہلیہ چیری بلیئر

اِتھے ای ایہناں دا میل چیری بوُتھ نال ہوئی اوہ اِرون دے چیمبر وچ ای ٹرینی بیرسٹر سی۔ چیری نے پہلے درجے وچ قنون دی ڈگری حاصل کیتی تے اوہ ٹونی بلیئر نالوں زیادہ ذہین سمجھیاں جاندیاں سی۔ ٹونی بلیئر تے چیری بوتھ نے 1980ء وچ بیاہ کرلیا۔ ٹونی بلیئر تے اوہناں دی گھر آلی چیری بلیئر چڑھدے لندن دے علاقے ہیکنی وچ اک گھر لے کے اوتھے رہن لگ گئے۔ نال نال اوہناں نے مقامی لیبر پارٹی ولوں سیاست وچ وی دلچسپی لینی شروع کر دتی۔

سیاست وچ حصہ

1981ء وچ اپنے سوہرے ٹونی بوتھ دے ذریعے اوہناں نے لیبر رکنِ پارلیمینٹ ٹام پینڈرے نال رابطہ کیتا تے آپ رکنِ پارلیمینٹ بنن وچ اوہناں نوں مدد لئی کہیا۔ پینڈرے دے کہن تے ای اوہ بیکنز فیلڈ دے حلقے توں لیبر پارٹی دے امیدوار بنے۔ کنزرویٹو پارٹی دے گڑھ وچ اوہناں دے منتخب ہون دا کوئی امکان نئیں سی پر اوہ لیبر لیڈر مائیکل فٹ دی توجہ حاصل کرن وچ کامیاب ہو گئے اوہ اوہناں دے جذبے توں متاثر ہوئے تے اوہناں نوں ٹونی بلیئر دا سیاسی مستقبل روشن نظر آیا۔

ٹونی بلیئر تے لیبر پارٹی

1983ء دے عام انتخابات وچ ٹونی بلیئر سیجفیلڈ دے حلقے توں رکنِ پارلیمنٹ منتخب ہوئے۔ اوہناں دی گھر والی چیری بلیئر نے وی انتخابات وچ حصہ لیا پر اوہ جِت نہ سکی۔ اپنے پارلیمنٹری کیریئر دے پہلے ورھے وچ ای اوہناں نوں گورڈن براؤن دی شکل چ اک ہانی لَبھ گیا جیہڑے اوہناں ونگوں ای لیبر پارٹی نوں سیاست دے جدید تقاضیاں نال ہم آہنگ کرن دا مشن رکھدے سی۔ گورڈن براؤن تے پیٹر مینڈلسن دے نال مِل کے ٹونی بلیئر نے پارٹی دی غیر مقبول پالیسیاں نوں بدل کے ایہنوں دوبارہ لوکاں لئی قابل قبول بناون دا بیڑا چکیا۔اوہناں نوں اپنی نویاں پالیسیاں وچ فری مارکیٹ اکانومی تے سماجی انصاف دا امتزاج پیش کیتا۔ ٹونی بلیئر میڈیا وچ لیبر پارٹی دے امیج دے بارے وچ بہت فکر مند سی۔ اوہناں نے لیبرپارٹی دے تعلقات عامہ دے شعبے تے خاص توجہ دتی تے سابق ٹیبلائڈ صحافی الیسٹر کیمبل دی خدمات حاصل کیتیاں۔

وزیراعظم

اوہناں دی میڈیا پالیسی کامیاب ثابت ہوئی تے لیبر پارٹی نے 1997ء وچ ہون والے عام انتخابات وچ بے مثال کامیابی حاصل کیتی تے ٹونی بلیئر صرف چتالی سال دی عمر وچ وزیر اعظم بن گئے۔ اوہ پِچھلے دو سو سال وچ برطانیا دے سبھ توں گھٹ عمر وزیر اعظم سی۔

استِعفا

ٹونی بلیئر نے 2001ء تے 2005ء وچ ہون والے عام انتخِابات وچ وی کامیابی حاصل کیتی پر کامیابی دا مارجن گھٹ گیا۔ عوامی سطح تے اوہناں دی مقبولیت نوں سبھ توں زیادہ دھچکا اوہناں دی عراق پالیسی دی وجہ توں پہنچیا۔ جیہدی وجہ نال اوہ امریکی پالیسی دے کول اپنے دیس دے لوکاں توں دور گئے۔ لوکاں ولوں ڈاھدی تنقید پاروں اوہناں نوں وزیراعظم دا عہدہ چھڈن تے مجبور ہونا پیا۔ 2 مئی 2007ء وچ اوہناں نے 27 جون 2007ء نوں اپنا عہدہ چھڈن دا اعلان کردِتا تے مئی 2007ء نوں وزیراعظم دے عہدے توں الگ ہوگئے۔

برطانیہ دے وزیراعظم

چرچل · ڈیوڈ کیمرون · جان میجر · ٹونی بلیر · گورڈن براؤن · مارگریٹ تھیچر · جیمز کالاہان · ہیرلڈ ولسن · ایڈورڈ ہیتھ · ایلک ڈگلس ہوم · ہیرلڈ میکملن · اینتھنی ایڈن ·