آکسفورڈ یونیورسٹی

آزاد انسائیکلوپیڈیا، وکیپیڈیا توں
آکسفورڈ یونیورسٹی
ماٹو: رب میرا چانن اے۔
بنی: 1096
پڑھاکو: 21،535
چانسلر: کرس پیٹن
تھاں : آکسفورڈ ، برطانیہ
دان کیتے پیسے 3.316 بلین پاؤنڈ
ویب سائیٹ [۱]
یونیورسٹی کالج، آکسفورڈ 1249 وچ بنیا

آکسفورڈ یونیورسٹی برطانیہ دے نگر آکسفورڈ چ اک یونیورسٹی‏ اے۔ ایہ دنیا دی دوسری سب توں پرانی تے انگریزی بولن والی دنیا دی سب توں پرانی یونیورسٹی اے[۱]۔ ایتھے 11 ویں صدی توں پڑھائی ہو رئی اے۔ یونیورسٹی چ تیزی نال وادا ہویا جدوں انگریز بادشاہ ہنری II نے انگریز پڑھاکواں نوں سینٹ تھامس بیکٹ دے قتل مگروں پیرس یونیورسٹی چ پڑھن توں روک دتا۔ 1209 چ ایتھے دے وسنیکاں تے پڑھاکواں وشکار اک پھڈا پے گیا تے جس توں ایتھوں لوک کیمبرج نس گۓ تے اینج کیمبرج چ کیمبرج یونیورسٹی دی نیو پئی۔ دونویں یونیورسٹیاں رلدیاں وی نیں پر دوناں چ جوڑ وی بڑا پرانا اے۔ 1249 وچ یونیورسٹی کالج، آکسفورڈ ایتھے بنن والا پہلا کالج سی 2008 وچ گرین ٹمپلیٹن آخری۔ آکسفورڈ یونیورسٹی برطانیہ دیاں ودیا یونیورسٹیاں چ اتلی پرھر تے رہن والی یونیورسٹی اے۔ آکسفورڈ لگاتار دنیا دیاں دس ودیا یونیورسٹیاں چ آرئی اے۔ ایہ یورپ دیاں ودیا تے کھوج پرکھ کرن والیاں یونیورسٹیاں چ آندی اے۔

یونیورسٹی پڑھائی ہفتہ وار ٹیوٹوریل تے اوہدے نال استاداں دے لیکچر، لیبارٹری پریکٹیکل دے دوالے کمدی اے جینوں آکسفورڈ دے کالج تے ہال آپ بندوبست کردے نیں۔ ایہ یونیورسٹی 38 کالجاں تے 6 پرائیوٹ ہالاں نال رل کے بندی اے۔ ایس یونیورسٹی دے پڑھے ہوۓ لوک ودھیا پڑھاکو، سینسدان، کھوجی، فوجی، سیاسی آگو تے لکھاری منے گۓ۔ یونیورسٹی دے 32 ّپڑھاکواں نے سائینس وچ نوبل انعام لۓ۔

تریخ[سودھو]

مڈھ

آکسفورڈ یونیورسٹی برطانیہ دے صوبے انگلینڈ دی کاؤنٹی آکسفورڈشائر دے شہر آکسفورڈ چ اے۔ آکسفورڈ یونیورسٹی دی نیو رکھن دا ٹھیک دن یا سال تے کسے نوں پتہ نیئں‏ پر ایتھے 1096 چ پڑھائی شروع ہوگئی سی۔ 1167 چ جدوں پیرس یونیورسٹی فرانس چوں بدیسی پڑھاکواں نوں کڈ دتا گیا تے اوناں چوں کئی آکسفورڈ آگۓ تے ایس یونیورسٹی نوں وادا دتا۔ ویلز دا تریخ لکھاری گیرالڈ 1188 نوں ایتھے پڑھا ریا سی۔ ایمو جیہڑا فریزلینڈ توں سی تے 1190 وج آیا ایتھوں دے پہلے بدیسی پڑھاکواں وچوں سی۔ 1201 دے دوالے ایتھے دے آگو نوں چانسلر کیا جان لگا۔ ویلے نال ایہ یونیورسٹی وددی رئی تے ایتھے کئی پڑھائی دے ادارے وکھرے فرقیاں تے لوکاں نیں بناۓ۔ لوک تھاں دی بنا تے وی ایتھے رل کے ریندے سن۔ 13ویں صدی دے وشکار کئی لوکاں اپنے خرچے تے ایتھے کالج بناۓ۔ ایہوجۓ لوکاں وچ ولیم آف ڈرہم سی جینے 1249 وچ یونیورسٹی کالج، آکسفورڈ تے جان بالیول نے جیہڑا سکاٹلینڈ دے بادشاہ دا پیو سی بالیول کالج، آکسفورڈ 1263 وچ بنایا۔ 1264 وچ والٹر ڈی مرٹن نے جیہڑا پہلے انگلینڈ دا چانسلر تے راچسٹر دا بشپ سی مرٹن کالج، آکسفورڈ دا مڈھ رکھیا۔ اوہنے ایس کالج نوں اینج چلایا جے ایہ کالج ایتھوں دے دوسرے کالجاں تے فیر کیمبرج یونیورسٹی لئی وی اک ادھارن بنیا۔

رینیساں

رینیساں ویلے دیاں نویاں سوچاں نے آکسفورڈ نوں وی اپنے رنگ وچ رنگیا۔ یونانی بولی دی پڑھت شروع ہوئی۔ ریفارمیشن دے ٹرن نال ایتھوں کیتھولک استاد نسے۔ پرانے ول دی پڑھائی نوں چھڈ کے رینیساں ول دی پڑھائی دا رواج پیا۔ 1636 وچ ولیم لاؤڈ کنٹربری دے آرچ بشپ نے ایتھے دے کالجاں لئی اصول بناۓ جیہڑے 19ویں صدی دے مڈھ تک لاگو رۓ۔ 1586 وچ آکسفورڈ یونیورسٹی پریس نے یونویورسٹی تے عام لوکاں لئی کتاباں چھاپن دا مڈھ رکھیا۔ انگریزی گھر دی لڑائی (1642–1649) وچ یونیورسٹی بادشاہ ول سی تے شہر پارلیمنٹ ول۔ 18ویں صدی دے وشکار توں یونیورسٹی نے فیر سیاست وچ حصہ ناں لیا۔

نواں ویلہ

آکسفورڈ موومنٹ (1833–1845) نے 19ویں صدی دے مڈھ توں یونیورسٹی نوں اک نواں روپ دتا۔ زبانی دی جگہ لکھ کے داخلے دا امتحان لیا جان لگ پیا۔ مزہبی ماملیاں وچ چوکھی ازادی دتی گ‏ئی۔ سوانیاں لئی 4 کالج وی کھولے گۓ۔ پرا‏وی کونسل نے روز دی مزہبی عبادت دا لازمی کرنا مکا دتا۔ یونیورسٹی وچ زور تے کلاسیکی پڑھت تے سی پر ویلے نال سائینس تے دوجیاں پڑھتاں وی رلائیاں گیآں۔ پرانی یونانی 1920 تک تے لاطینی 1960 تک داخلے ل‏ئی ضروری سی۔ کمیونزم تے نازی جرمنی توں نس کے کئی ودھیا استاد وی آکسفورڈ نوں ملے۔

آکسفورڈ نے برطانیہ دے سماج دے ہر پاسے نوں ودھیا لوک دتے۔ 40 توں ودھ نوبل انعام لینوالیاں تے 50 توں ودھ دنیا دے آگواں دا جوڑ ایتھون نال اے۔

سوانی پڑھائی

لیڈی مارگریٹ ہال, آکسفورڈ آکسفورڈ دا پہلا زنانہ کالج

لیڈی مارگریٹ ہال, آکسفورڈ[۲] (1878) تے سمرولے کالج، آکسفورڈ (1879) سوانیاں لئی کھلن والے پہلے کالج سن۔ ایہناں دو کالجاں دے پہلے 21 پڑھاکو اک بیکری دے اتے لگن والی کلاس وج پڑھدے سن۔ ایہناں مگروں سینٹ ہگ کالج، آکسفورڈ (1886)، سینٹ ہیلڈا کالج، آکسفورڈ (1893)، سینٹ اینز کالج، آکسفورڈ (1879) کھلے۔ آکسفورڈ پڑھائی وج مرداں دا گڑھ سی۔ 7 اکتوبر 1920 نوں سوانیاں نوں پورے ول نال ایتھے پڑھن تے ڈگری لین دی ازادی لبی۔ 1927 وچ سوانیاں دا کوٹہ اک چوتھائی رکھن دا قنون بنایا گیا جیہڑا 1957 تک لاگو ریا۔

بریسنوز کالج، آکسفورڈ، جیسس کالج، آکسفورڈ، وادھم کالج، آکسفورڈ، ہرٹفورڈ کالج، آکسفورڈ تے سینٹ کیتھرائن کالج، آکسفورڈ 1974 وچ پہلے کالج سن جنہاں سوانیاں نوں وی داخلہ دینا شروی کیتا ایس توں پہلے ایہ صرف مرداں لئی سن۔ بوڈلین لائیبریری یونیورسٹی دی منی پرمنی تے پرانی لائیبریری اے۔

کیمپس[سودھو]

یونیورسٹی کول دوجیاں یونیورسٹیاں وانگوں کوئی اک کیمپس نہیں۔ ایہدے 38 کالج، 6 ہال، ہوسٹل تے لائیبریریاں پورے آکسفورڈ شہر وچ پسرے ہوۓ نیں۔ سائینس ایریا کج کیمپس وانگوں لگدا اے جے ایتھے کئی پاسے کٹھے نیں۔ شیلڈونین تھیٹر اوہناں کوٹھییاں وچوں اے جنہاں نوں یونیورسٹی دا نشان سمجھیا جاندا اے۔ ایہ موسیقی دے پروگراماں، لیکچراں تے یونیورسٹی پروگراماں لئ ورتیا جاندا اے۔ شیلڈونین تھیٹر توں پہلے سینٹ میری گرجا یونیورسٹی پروگراماں لئی ورتیا جاندا سی۔ کرائیسٹ چرچ کیتھڈرل، آکسفورڈ, کاؤنٹی دا وڈا گرجا وی اے تے کرائسٹ چرچ کالج، آکسفورڈ دا وی گرجا اے۔

یونیورسٹی دے 38 کالجاں دی لسٹ ایہ اے:

یونیورسٹی وچ 6 ہال وی نیں جیہڑے وکھرے سائي انگاں نے بناۓ نیں۔ ایہ 6 ہال ایہ نیں:

بالیول کالج، یونیورسٹی کالج تے مرٹن کالج ایتھوں دے سب توں پرانے کالج نیں تے ایہناں دا مڈھ 13ویں صدی وچ پیا سی۔ گرین ٹمپلیٹن کالج اکتوبر 2008 وچ بنیا تے سب توں نواں کالج اے[۳]۔

1965 وچ ایتھے دے کالجاں دا آپسی میل ودھان تے اکو جیاں پالیسیاں نوں بنان تے لاگو کرن لئی کانفرنس آف کالجز بنائی گئی۔ کالجاں دے استاداں نوں عام بولی وچ ڈون کیا جاندا اے (پر ایس شبد نوں یونیورسٹی آپ نہیں ورتدی)۔

رہن تے کھان پین دیا سہولتاں نال ایتھے دے کالج اپنے وسنیکاں نوں رہتلی، سماجی تے پھرن ٹرن دیاں سہولتاں دیندے نیں۔ کالجاں دی زمیواری انڈرگریجویٹاں نوں داخلہ دینا تے پڑھائی دا بندوبست کرنا اے گریجویٹاں لئی ایہ زمیواری ڈیپارٹمنٹ پوری کردے نیں۔ کالجاں دے آگواں لئی کوئی پکا ناں نئیں ایہ پرنسپل، پرووسٹ، وارڈن، ریکٹر، ڈین تے ماسٹر اخواندے نیں۔

پربندھ[سودھو]

آکسفورڈ یونیورسٹی 40 دے نیڑے کالجاں نال رل کے بندی اے جیدا آگو وائس چانسلر ہوندا اے۔ چانسلر دی کرسی نمیشی ہوندی اے۔ چانسلر نوں چنیا جاندا اے جد کے اصل طاقت وائس چانسلر کول ای ہوندی اے۔ یونیورسٹی کونسل ایدے چلان تے قنون بنان دی زمیوار اے۔ ایدے وچ وائس چانسلر ڈیپارٹمنٹس دے آگو، کج چنے لوک تے سٹوڈنٹ یونین دے لوک ہوندے نیں۔

21000 ّ توں ودھ پڑھاکو ایتھے پڑھدے نیں جنہاں وچوں 11,752 انڈرگریجویٹ تے 9621 گریجویٹ نیں۔ 2012 وچ 17200 پڑھاکوواں نے ایتھے پڑھن لئی آکھیا تے اوہناں چوں 3000 نوں ایتھے انڈرگریجویٹ پڑھائی لئی داخلہ ملیا۔ یونیورسٹی دے 41٪ پڑھانوالے بدیسی نیں تے ایہناں دا ساک 100 دے نیڑے دیساں نال اے[۴]۔ ّپڑھاکواں دا تیجا حصہ یعنی 8,100 دے نیڑے بدیسی نیں تے ایہ 140 توں ودھ دیساں توں آندے نیں تے سب توں چوکھے امریکہ توں۔ 2011/12 وچ یونیورسٹی کول £ 1,016.1 ملین پیسے آے جد کے سرکار تے لوک وی یونیورسٹی نوں دان کردے نیں۔ 2011-12 وچ یونیورسٹی دا خرچہ 971.8 ملین پاؤنڈ سی۔

آکسفورڈ وچ سال دی پڑھائی نوں تن حصیاں وچ ونڈیا جاسکدا اے: مائیکل مکس ٹرم، اکتوبر توں دسمبر؛ ہلری ٹرم، جنوری توں مارچ تک تے ٹرینیٹی ٹرم اپریل توں جون تک۔ ایہدے نال کونسل 8 ہفتے دی فل ٹرم وی چلاندی اے جیدے وچ پڑھائی ہوندی اے۔

آکسفورڈ یونیورسٹی پریس، یونیورسٹی دا اک انگ دنیا دا سب توں وڈا یونیورسٹی چھاپن گڑھ اے ایدیاں ڈکشنریاں تے ہور کتاباں ساری دنیا وچ پڑھیاں جاندیاں نیں۔ ایھے کامے 5000 دے نیڑے سارے دنیا وچ پھیلے نیں۔

جوڑ

آکسفورڈ یونیورسٹی برطانیہ دیاں کھوج وچ اگے ودھویاں یونیورسٹیاں دی ٹولی رسل گروپ وچ آندی اے۔ ایہ کو‏ئمبرا گروپ، جی5، لیگ آف یورپی ریسرچ یونیورسٹیز تے انٹرنیشنل الائنس آف ریسرچ یونیورسٹیز دی سنگی اے۔ ایہ یورپیئم دی مڈھلی سنگی تے برطانوی یونیورسٹیاں دی سنہری تکون وچ اندی اے۔

داخلہ[سودھو]

برطانیہ دیاں دوجیاں یونیورسٹیاں وانگوں ایتھے وی پڑھاکو 17 یا 18 یا 19 ورے دے ہوکے انڈرگریجویٹ پڑھائی شروع کردے نیں۔ پر ایہ گل پکی نہیں ایس توں تھلے یا اتے دی عمر نوں وی داخلہ مل سکدا اے تے صرف اک کالج ہارس مانچسٹر وچ 21 ورے دی عمر وچ ای داخلہ ملدا اے۔ کئی نکی عمر دے بالاں نوں وی ایتھے داخلہ ملیا جنہاں داخلے دی مڈھلی شرط یعنی میٹرک کیتا ہوے دی شرط پوری کیتی۔

15 اکتوبر توں داخلے لئی لکھنا پیندا اے۔

مانتا[سودھو]

2012 وچ ٹائمز نے دنیا دے 149 دیساں وچ 17,554 پڑھائی نال رلدے لوکاں کولوں پچھیا تے ایہ پتہ چلیا جے آکسفورڈ دنیا دیاں 6 وڈی مانتا والیاں یونیورسٹیاں وچ گنی جاندی اے جیدی پوری دنیا وچ اپنی اک پچھان اے۔ 2012 وچ دنیا دیاں ودیا یونیورسٹیاں دی پدھر وچ آکسفورڈ یونیورسٹی 10 نمبر تے سی تے 2005 تے 2006 وچ دوجے نمبر تے۔ یورپ وچ 2012 وچ ای 2 نمبر تے سی۔

شیلڈونین تھیٹر

کلب تے سنگتاں[سودھو]

کالجاں وشکار کھیڈاں ہوندیاں نیں جنہاں نوں کپرز دا ناں دتا جاندا اے ۔ ایہدے نال پڑھاکواں دے کھیڈ کلب نیں جتھے ودھیا پدھر دیاں کھیڈاں ہوندیاں نیں۔ پر اکھ ہر ورے ہونوالے کیمبرج نال کھیڈاں تے ریندی اے۔ کشتی دوڑ سب توں اگے اے جیہنوں ٹی وی تے وی 50 لکھ توں اک کروڑ تک لوک ویکھدے نیں۔ کھیڈاں وچ جتنوالے نوں سب توں وڈا انعام اک نیلا ربن دتا جاندا اے۔

چرول تے آکسفورڈ سٹوڈنٹ پڑھاکواں دے ہفتے چ اکواری چھپنوالے اخبار نیں۔ اسیس میگزین، آؤل جرنل، اوکسیمورون تے اوکسونین ریویو ایتھے دی میگزین نیں۔ آکسائڈ ریڈیو، یونیورسٹی دا ریڈیو سٹیشن اے۔ کئی کالجاں دیاں موسیقی تے ڈرامہ سنگتاں نیں۔ پڑھاکو سنگتاں وچ آکسفورڈ یونیورسٹی سائینسی سنگت دنیا دیاں پرانیاں سنگتاں وچوں اک اے۔

آکسفورڈ یونین مانتا وج سب توں اگے اے ایہ 1832 وچ بنی کمیبرج مگروں برطانیہ دی سب توں پرانی پڑھاکو یونین اے جتھے ہر ہفتے تقریراں دے مقابلے ہولدے نیں تے اچے پدھر دے گل باتۓ حصہ لیندے نیں۔

لائیبریریاں[سودھو]

ریڈکلف کیمرہ 1749 وچ بنی اک سائینس لائیبریری

آکسفورڈ یونیورسٹی کول برطانیہ دی دوجی وڈی لائیبریری بوڈلین لائیبریری اے۔ ایہدے 40٪ ورتنوالے باہری لوک نیں۔ ایتھے دیاں لا‏ئیریریاں وچ 11 ملین کتاباں نیں جیہڑیاں 190 کلومیٹر (120 میل) لمے شیلفاں تے پئیاں ہویاں نیں تے ہر ورے اوتھے 3 میل یا 5 کلومیٹر لمے شیلفاں دا وادا ہوریا اے۔ بوڈلین لائیبریری 1603 وچ بنی۔ ایہ 28 لائیبریریاں دا جٹ اے۔ ریڈکلف کیمرہ 1749 وچ بنی اک سائینس لائیبریری اے۔

میوزیم[سودھو]

آکسفورڈ یونیورسٹی میوزیم

آکسفورڈ وچ کئی میوزیم تے آرٹ گیلریاں نیں جنہاں نوں 20 لکھ لوک ہر ورے مفت ویکھ سکدے نیں۔ ایشمولین میوزیم 1683 وچ بنیا تے ایہ دنیا دا پہلا یونیورسٹی میوزیم تے برطانہ دا پہلا میوزیم اے۔ ایہدے وچ ولیم ٹرنر، پیبلو پکاسو، مائیکل اینجلو تے لیونارڈو ڈی ونچی ورگے لوکاں دے کم تے آرکیالوجی دے نمونے پۓ نیں۔

آکسفورڈ یونیورسٹی میوزیم وج کیڑے جنور تے رلدیاں شیواں نمیش لئی پیآں نیں۔ ایدے اندر ٹائرینوسارس تے تریسراٹاپس دے ٹانچے وی پۓ نیں۔ ایتھے ای ڈوڈو دا پورا ٹانچہ وی پیا ہویا اے۔ آکسفورڈ یونیورسٹی میوزیم دے لاگے ای 1884 وچ کھلن والا پٹ رورز میوزیم اے۔ ایتھے 500,000 توں ودھ شیواں آرکیالوجی تے اینتھروپالوجی تے پیآں نیں۔

میوزیم آف سہٹری آف سائینس وچ 15000 توں ود سائینس دی تریخ دسدیاں شیواں نیں۔

پارک[سودھو]

آکسفورڈ یونیورسٹی پھلواری

یونیورسٹی پارکس شہر توں اتر ول 70 ایکڑ تے پھیلیا چرول دریا دے کنڈے تے پارک اے جیتھے کھیڈن دے ویہڑے تے پھلواریاں نیں۔ آکسفورڈ یونیورسٹی پھلواری برطانیہ دی سب توں پرانی تے دنیا دی تیسری سب توں پرانی سائینسی پھلواری اے۔ ایہ 1.8 4½ ایکڑ تے پھیلی اے تے ایہدے وچ 8000 توں ودھ بوٹیاں دیاں ونڈاں نیں۔ ہارکورٹ رکھ 130 ایکڑ تے پھیلیا ہویا آکسفورڈ دے دکھن وچ اک رکھ اے۔ ایہناں توں ہٹ کے کئی کالجاں کول وی پارک ہے نیں جیہڑے عام لوکاں لئی وی کھلے نیں۔

ریتاں[سودھو]

امتحان، میٹرک، ڈسپلن گل بات یا کسے یونیورسٹی افسر نوں ملن ویلے یونیفارم پانا ضروری اے۔ ہور ریتاں ہر کالج دیاں وکھریاں نیں۔ کج کالجاں وچ ہفتے دے چھے دن کھانا ہوندا تے کجاں وچ کدے کدے۔ کالجاں وچ نچن پارٹیاں وی ہوندیاں نیں۔ جتھے چٹی ٹائی پانی شرط اے۔ کجاں وچ کالی ٹائی شرط اے۔ گرمیاں وچ کشتی چلانا وی اک ٹھرک اے۔

کرائسٹ چرچ کالج

مشہور پڑھیار[سودھو]

آکسفورڈ دی پوری تریخ وچ ایتھے دے پڑھاکواں نے کئی کماں وچ مانتا کمائی۔ سنتالیاں نیں نوبل انعام ایھدیاں 6 ونڈاں وچ جتے۔

سیاست

26 برطانوی وزیراعظماں نے جنہاں وچ گلیڈسٹون ورگے ناں نے ایتھے پڑھیا اے۔ لڑائی مگروں بنن والے وزیراعظماں وچوں صرف ایتھے نئیں سی پڑھیا۔ 2010 دی ہاؤس آف کامنز دے 100 سنگی ایتھے پڑھے سن تے ایدھے نالی 140 آکسنی ہاؤس آف لارڈز دے سنگی سن۔

دنیا دے 30 دے نیڑے سیاسی آگو ایتھے پڑھے جنہاں وچ پاکستان دے 5 وزیراعظم لیاقت علی خان، حسین شہید سہروردی، فیروز خان نون، ذوالفقار علی بھٹو، بینظیر بھٹو ایتھے پڑھے۔ ہندستانی اندرا گاندھی تے منموہن سنگھ ایتھوں دے ای پڑھیار سن۔

میتھمیٹکس تے سائینس

آکسفورڈ دے تن میتھمیٹکس گروواں مائیکل اتیہ، ڈینیل کولن تے سائمن ڈونلڈسن نے فیلڈز میڈل جتے جسنوں میتھمیٹکس دا نوبل انعام وی کیا جاندا اے۔ ورلڈ وائڈ ویب دا موڈھی ٹم برنرز لی وی ایتھے ای پڑھیا۔

رابرٹ بوائل نویں کیمسٹری دا موڈی ایس یونیورسٹی وچ کدے وی نئیں پڑھیا ناں ای ایتھے اوہنے پڑھایا پے ایتھے دے سائنیسی محول نے اوہنوں ایتھے ول کھچیا تے اوہنوں ایتھوں آدری ڈگری وی ملی۔ البرٹ آئینسٹائن تے شروڈنگر نے وی ایتھے کج چر لنگھایا۔

ایس یونیورسٹی دے 11 لوکاں نے کیمسٹری، 5 نے فزکس تے 16 نے دوائیاں وچ نوبل انعام جتے۔

اکنامکس تے فلاسفی

امرتیا سین تے ایڈم سمتھ نے ایتھے اپنیاں سوچاں نوں تیز کیتا۔

تھامس ہابس، جرمی بینتھم تے جان لاک نے آکسفورڈ توں ڈگریاں لیآں۔

کھیڈاں

50 اولمپک ٹکے جتن والے لوکاں دا ساک کسے ناں کسے پاسیوں ایس یونیورسٹی نال سی۔

کشتی دی دوڑ

ہور ویکھو[سودھو]

اتہ پتہ[سودھو]

  1. ^ A Brief History of the University". University of Oxford. Retrieved 30 October 2007.
  2. ^ "History", Lady Margaret Hall, University of Oxford
  3. ^http://www.ox.ac.uk/about_the_university/facts_and_figures/index.html#aoxford_awards_and_rankings Archived 2011-09-02 at the وے بیک مشین
  4. ^ http://www.ox.ac.uk/about_the_university/facts_and_figures/index.html#aoxford_awards_and_rankings Archived 2011-09-02 at the وے بیک مشین

بارلے جوڑ[سودھو]