ٹھنڈی لڑائی

آزاد انسائیکلوپیڈیا، وکیپیڈیا توں
روسی خانہ جنگی دے دوران 1918ء چ امریکی فوجی دستے ولادی ووستوک چ
یالٹا کانقرنس چ تن وڈے چرچل ، روزویلٹ تے سٹالن ، 1945ء
دوجی جنگ عظیم دے بعد اتحادیاں دے چرمنی چ مل مارے علاقے
سرد جنگ دے دوران یورپ تے مشرق وسطی دے دیس جنہاں نوں مارشل پلان امداد ملی

امریکہ تے سویت یونین تے انہاں دے اتحادیاں دے وچکار 1940ء توں 1990ء دی دہائی تک چلن آلے تنازع ، تناء تے مقابلے نوں سرد جنگ آکھئیا جاندا اے ۔ اس سارے چر چ ایہہ دو وڈیاں طاقتاں جیون دے ہر میدان چ اک دوجے دے مقابلے چ رہئیاں ،جنہاں چ فوجی اتحاد ، نظریئے ، نفسیات ، جاسوسی ، فوجی طاقت ، صنعت ، خلائی دوڑ دفاع تے وڈے خرچے ، روایتی تے جوہری ہتھیاراں دے دوڑ تے ہور دوجے شعبے شامل نیں ۔ ایہہ امریکہ تے روس وچکار براہ راست فوجی مداخلت دی جنگ نئیں سی پر فوجی تیاری تے دنیا بھر چ اپنی حمایت لبھن لئی سیاسی جنگ دی ادھ صدی سی ۔

حالانکہ امریکا تے روس دوجی جنگ عظیم چ‍ جرمنی دے خلاف اکٹھے سن پر جنگ دے مگروں تعمیر نو دے حوالے نال اینہاں دے نظریئے بالکل مختلف سن ۔ کجھ دہائیاں چ سرد جنگ یورپ تے دنیا دے ہر خطے چ پھیل گئی ۔ امریکہ نے اشتراکی نظریات نوں روکن لئی لہندے یورپ ۔ لہندے ایشیاء تے چڑھدے دکھنی ایشیا چ کئی دیساں نال اتحاد قائم کیتے ، اس وچکار کئی وار ایہو جہے تنازعے بنے جہڑے جگ نوں اک نویں عالمی جنگ دے نیڑے لے آئے جنہاں چ برلن ناکہ بندی (1948ء توں 1949ء) کوریا جنگ (1950ء توں 1953ء) ویت نام جنگ ( 1959ءتوں 1975ء) ،کیوبا میزائل بحران (1962ء) تے سویت افغان جنگ ( 1979ء توں 1989ء) قابل ذکر نیں ۔ اس دی علاوہ ایسے ویلے وی آئے جدوں دوناں دیساں وچکار تناء گھٹئیا ۔ 1980ء دی دہائی دے آخر چ سرد جنگ اوس ویلے مکن دے نیڑے آئی جدوں سویت آگو میخائل گورباچوف نے امریکی صدر رونالڈ ریگن نال کئی ملاقاتاں کیتیاں تے نال ای نال اپنے دیے چ اصلاحتی منصوبےآں دا اعلان کیتا ۔ اس وچکار روس چڑھدے یورپ چ اپنی طاقت کھوندا رہئیا تے آخر چ 1991ء چ ٹوٹے ٹوٹے ہو گئیا ۔