جرمنی

جرمنی
Federal Republic of Germany
Deutschland

جھنڈا	نشان
جرمن صدر:	جوخم گاؤک
جرمن چانسلر:	اینجلا مرکل
راجگڑھ:	برلن
تھاں:	357.114,22 مربع کلو میٹر
لوک گنتی:	82.169.000
کرنسی:	یورو

جرمنی وشکارلے یورپ دا اک دیس اے۔ ایدی لوک گنتی 8 کروڑ 22 لکھ اے۔ جرمنی نے 357,021 مربع کلومیٹر تھاں کعیری ہوئی اے. ایس دی بولی جرمناے۔ ایہدے 16 صوبے نیں. جرمنی دے اتر وچ اتلا سمندر ، ڈنمارک تے بالٹک سمندر نیں ، چڑھدے ول پولینڈ تے چیک لوک راج، دکھن وچ آسٹریا تے سویٹزرلینڈ تے لیندے وچ فرانس، لکسمبرگ، بیلجیم تے نیدرلینڈز نیں۔ برلن ایدا راجگڑھ اے۔ اے نیٹو تے یورپی یونین دا وی سنگی اے۔ 8 کروڑ 22 لکھ لوکاں نال اے یورپی یونین دا وڈا دیس اے۔

[لکھو] ناں

انگریزی دا بول 'جرمنی' لاطینی بول جرمانیہ توں بنیا اے۔ جرمانیہ بول جولیس سیزر توں چلیا تے اوہنے ایہہ فرانس وچ سُنیا سی جتھے ایہنوں رہائن دریا توں چڑھدے پاسے دے واسیاں لئی ورتیا جاندا سی۔ اینوں جرمن وچ ڈوئچلانڈ کیندے نیں، ڈو‏ئچ مطلب لوکاں دا، لوکاں دا دیس۔ عربی تے فرانسیسی وچ اینوں المانیا آکھیا جاندا اے۔

[لکھو] تریخ

تھلواں سکینڈینیویا تے اتلا جرمنی, جرمن قبیلیاں دا اصل دیس اے جتھے اوہ صدیاں پہلے وس رۓ سن۔ پہلی صدی توں پہلے اوہ ایس تھاں توں دکھن چڑھدے تے لیندے ول آۓ تے اوناں دا دوجے لوکاں نال وا پیا۔ رومی شہنشاہ آگسٹس نے جرمانیہ تے مل مارن دا سوچیا تے اک فوج 9 عیسوی چ دریاۓ رائن دے پار جرمنی وچ کلی پر جرمن سردار چیرسکن نےٹیوٹوبرگ جنگل دی لڑائی چ رومی فوج نوں ہرا کے پچھے کردتا۔ تیسری صدی وچ جرمن لوک ودھے تے اوناں دے کئی قبیلے سامنے آۓ۔ اوہ آلے دوالے دےدیساں وچ وڑن لگ گۓ۔ اک جرمن فبیلے فرینک نے گال تے مل ماریا تے اوس دیس ناں بن گیا فرانس۔

[لکھو] رومی جرمن سلطنت

مارٹن لوتھر

25 دسمبر 800 نوں شارلمین نے رومی سلطنت دی نیوں رکھی جیہڑی 843 چ ونڈی گ‏ی۔ رومی جرمن سلطنت ایدا چڑھدے پاسے دا انگ سی۔ایہہ آئیدر دریا توں لے کے بحیرہ روم تک پھیلی ہوئی سی۔ اٹو شہنشاہاواں (919–1024) دے ویلے ک‏ی انگاں نوں کٹھا کیتا گیا تے 962 چ جرمن بادشاہ نوں ایناں راجاں دا اک جٹ بناکے اودا ناں رومی جرمن سلطنت رکھ کے شہنشاہ بنا دتا گیا۔ 1215 تک ایدے چ برگنڈی تے اتلا اٹلی رلے۔ 12ویں تے 13ویں صدی چ جرمن چڑھدے پاسے دے سلاو لوکاں دے دیساں ول ودے۔ ہانزا لیگ دیاں سنگی تھانواں امیر ہویاں۔ 1315 دے وڈے قحط تے 1348-50 دے طاعون نے جرمن لوکاں دی گنتی نوں تھوڑا کردتا۔ 15ویں صدی توں ایہہ شہنشاہ، ہاپسبرگ ٹبر چوں ای چنے جاندے سن۔

1517 وچ مارٹن لوتھر نیں کیتھولک چرچ دے کماں تے انگلی چکی تے انج پروٹسٹنٹ فرقہ ٹر پیا۔ بوت سارے جرمن دیساں وچ لوتھرن چرچ ای سرکاری مذہب سی۔ ایہہ مذہبی جگڑا 30تی سالہ لڑائی دی وجہ بن گیا جیہدے وچ 30 ٪ جرمن لوک مارے گۓ۔ 1648 نوں لیندے فالیا دے امن نال لڑائی مک گئی پر سلطنت عملی طور تے ونڈی گئی۔ 1740 توں مگروں جرمنی تے کنٹرول لئی آسٹریا تے پرشیا دے وچکار کھیچل چلدی رہی۔ 1806 نوں [[نپولین دیاں لڑائیاں]] باجوں ایہہ سلطنت مُک گئی۔

[لکھو] انقلاب

فرانس دے نپولین دے 1814 چ ہارن مگروں ویانا کانگرس ہوئي جیدے چ 39 جرمن دیساں دا اک جٹ بنایا گیا۔ لوکاں وچ فرانس دے انقلاب نے گُوڑہیاں سوچاں پیدا کر دتیاں۔ آسٹرین سیاستدان میترنخ نے جینوں دبان لئی ٹل لائی۔ زولفراين جرمنی نوں کٹھا کرن دا اک وڈا قدم سی۔ 1848 چ جرمن دیساں چ انقلاب ایآ پر کوئی خاص تبدیلی ناں ہوئی۔ پرشیا وچ ازادی دیاں سوچاں نوں دبان لئی 1862 چ بسمارک نوں چانسلر لا دتا گیا۔ 1864 چ پرشیا نے ڈنمارک نوں ہرایا تے 1868 نوں آسٹریا پرشیا لڑائی وچ آسٹریا نوں ہرا کے ہمیشہ لئی آسٹریا نوں جرمن معاملاں توں باہر کڈھ دتا گیا۔ جرمنی نوں اک دیس بنا دے کم چ پرشیااگے سی۔

[لکھو] جرمن سلطنت(1871-1918)

جرمن سلطنت دی نیو ورسائی فرانس وچ

جرمن سلطنت دا نقشہ

فرانس، اتلے جرمنی دے اک جُٹ ہون تے تپ گیا۔ پرشیا تے فرانس دی لڑائی ہوگئی جیہدے وچ فرانس ہار گیا فرانس دا شہنشاہ جرمنی دا بندی بن گیا۔ پیرس دے نیڑے ورسائی دے محل وچ 18 جنوری 1871 نوں جرمن سلطنت دی نیو رکھی گئی۔ پرشیا دا ہوہنزولرن ٹبر دا بادشاہ ایس جرمن سلطنت دا شہنشاہ سی تے ایس جرمن سلطنت دا راجگڑھ برلن سی۔ آسٹریا نوں چھڈ کے ریندے سارے جرمن لوک جرمنی وچ وس رہے سن۔

1884 توں جرمنی نیں یورپ توں باہر وی افریقہ تے ایشیاء وچ اپنیاں کالونیاں بنا لئیاں۔ جرمنی نے تنزانیہ نمیبیا کیمرون تے ٹوگو وچ کالونیاں بنا لئیاں۔ شہنشاہ ولیم پہلاں دے ویلے تے جرمنی اک چنگی بالی پالیس تے چل رہیا سی پر شہنشاہ ولیم دوجے ویلے جرمن پالیسی پلٹ گئی فرانس نیں برطانیہ تے روس نال رشتے جوڑ لۓ۔ جرمنی نے سلطنت آسٹریا ہنگری تے سلطنت عثمانیہ نال جوڑ بنا لیا۔ 28 جون 1914 نوں سلطنت آسٹریا ہنگری دے شہزادے دے قتل توں پہلی وڈی لڑائی چھڑ گئی جیہدے وچ جرمنی نوں ہار ہوئی۔ اودے کولوں کلونیاں تے یورپ چ کئی تھاں کھو لۓ گۓ۔ لڑائی دے مگروں انقلاب آیا تے جرمن شہنشاہ نوں راج چھڈنا پیا تے جرمنی وچ لوک راج ٹر پیا۔ جرمنی نوں بے عزت کر دین آلیاں شرطاں منن تے لفادتا گیاجیہدی وجہ توں جرمنی وچ لوک خوش نہیں سن تے اے سمجھیا جاندا اے کہ ایہدی وجہ توں جرمنی وچ نازی پارٹی تے ہٹلر آۓ۔

[لکھو] وائمر لوک راج(1918-1933)

لڑائی تے انقلاب دے مگروں جرمنی وچ وائمر دی تھاں تے سرکار بنی۔ وائمر دی قنون تے 18 اگست 1918 نوں صدر ایبرٹ نے کگی ماری پر صلح دیاں پینڈیاں شرطاں تے کم کاج دے ڈپریشن نے لوکاں نوں وائمر لوک راج توں پرے کر دتاتے تیز سوچاں رکھن والی نازی پارٹی نوں تےاوہدے لیڈر ہٹلر نوں اگے ودھن دا ویلہ لب گیا۔

[لکھو] ہٹلری جرمنی

30 جنوری 1933 نوں ہٹلر جرمنی دا چانسلر بن گیا۔ 27 فروری 1933 نوں ریشتاگ نوں اگ لگ گئی تے اس گل نوں بہانہ بنا کے لوکاں دے حقاں تے تکڑیاں پابندیاں لا دتیاں گیاں ۔ 1939 نوں سویت یونین نال گل بات توں مگروں جرمن فوج نے پولینڈ تے چڑھائی کردتی جیہدے نال دوجی وڈی لڑائی ٹر پئی جیہنے ساری دنیا نون اپنی لپیٹ وچ لے لیا۔لڑائی 1945 تک چلی۔ 8 مئی 1945 نوں جرمنی نے ہتھیار سٹ دتے۔

[لکھو] جرمنی دی ونڈ

اس لڑائی وچ اک کروڑ دے نیڑے جرمن فوجی تے شہری مارے گۓ۔ جرمنی کولوں اوہدے کئی صوبے کھو لۓ گۓ۔ ڈیڑھ کروڑ جرمناں نوں یورپ دے دوجے دیساں چوں کڈ دتا گیا۔۔جرمنی نوں تے برلن نوں چار جتن والے سنگیاں نیں 4 ٹوٹیاں وچ ونڈ کے اوہدے تے مل مار لیا۔ فرانس برطانیہ تے امریکہ دے کھاتے وچ تین پاسے رلا کے 23 مئی 1949 نوں لیہندا جرمنی دی نیو رکھی گئی۔ سویت یونین والے جرمنی نوں 7 اکتوبر 1949 نوں چڑھدے جرمنی دے ناں نال اک وکھرا دیس بنا دتا گیا۔ لیہندا جرمنی تیزی نال اگے ودھن لگ گیا ایتھے لوک راج چل پیا 1955 وچ اے نیٹو دا سنگھی بن گیا۔ چڑھدے جرمنی وچ کمیونزم چلایا گیا تے ایہہ وارسا پیکٹ دا سنگھی بن گیا۔ برلن شہر دے لیہندے پاسے دے آلے دوالے اک دیوار کچھ دتی گئی۔ 3 اکتوبر 1990 نوں جرمنی دے دوہے پاسے رل گۓ برلن دوبارہ دارالحکومت بنا دتا گیا۔ جرمنی نے یورپی یونین وچ وڈا رول کھیڑیا۔ جرمن یورپ دے بجاۓ یورپین جرمنی دے فلسفے نوں اگے ودھایا گیا۔

[لکھو] جغرافیہ

تھلویں جرمنی دیاں سوانیاں دے کپڑے

جرمنی دی تھاں 357,021 مربع کلومیٹر اے۔ جیہدے وچ 349,223 کلومیٹر زمین اے تے 7,798 مربع کلومیٹر پانی اے۔ ایہہ تھاں نال یورپ دا 7واں وڈا دیس اے تے دنیا دا 63واں وڈا دیس اے۔ ایہہ الپس دیاں پہاڑیاں توں لے کے اتلے سمندر دے بالٹک سمندر تک پھیلیا ہویا اے۔ ایہناں دے وچکار اُچے تھاواں تے جنگل نیں تے اتلے تھاواں تے نیویں تھاں نیں۔الپس وچ سوگسپتزے 2962 میٹر نال جرمنی دی سب توں اُچی تھاں اے۔ ولسترمارش سمندر توں وی 3.54 میٹر نیویں اے۔ یورپ دے وڈے دریا رائن، ڈینیوب تے ایلبے جرمنی توں لنگھدے نیں۔ جرمنی یورپ دا نویکلا دیس اے جیہدے سب توں بوہتے گوانڈھی نیں ڈنمارک، پولینڈ، آسٹریا، سویٹزرلینڈ، فرانس، لکسمبرگ، بیلجیم، نیدرلینڈ تے چیک۔

[لکھو] جرمن ونڈ

جرمن صوبے

جرمنی دے 16 صوبے نیں جیڑے اے نیں: · برلن · بریمن · بادنورتمبرگ · باویریا · برانڈنبرگ · ہیسے · تھلواں سیکسنی · میکلنبرگ-پومرینیا · اتلا رائین لیندا فالیہ · رائین لینڈ-پالاٹیناٹے · سارلینڈ · سیکسنی · سیکسنی آنہالٹ · شلیسوگ ہولسٹاین · تھورنگیا · ہامبرگ

[لکھو] موسم

جرمنی دا موسم درمیانہ اے۔ اوقیانوس توں آن والی گلف سٹریم دے باجوں ایہہ سردیاں وچ بوتا ٹھنڈا نئیں ہوندا تے گرمیاں وچ بارشاں لگیاں ریہندیاں نیں تے گرمنی ناپ 30 درجہ سینٹی گریڈ دے آلے دوالے ریہندا اے۔

[لکھو] سرکار

جرمنی اک لوک راج اے جتھے صوبیاں نوں کم کرن دی کافی کھلی چھٹی اے۔ جرمن سیاست 1949 وچ بنن والے قنون تے چلدی اے۔ جرمنی دا سیاسی قنون جرمن پارلیمنٹ وچ دو تیہائی ووٹاں نال بدلیا جاسکدا اے۔ انساناں دے وڈے حق پارلیمنٹ، عدالتاں تے سرکار دا وکھریاں ہونا۔ ایہناں دی جرمن قنون وچ تبدیلی نہیں ہو سکدی۔ جرمنی دے اک جُٹ ہون توں بعد 1990 وچ ایس قنون وچ دو نکیاں جہیاں تبدیلییاں ہی ہوئیاں۔

جرمن چانسلر جرمن سرکار نوں چلاؤندا اے۔ ایہہ وزیراعظم ورگا ای ہوندا اے انجلا میرکل اج کل چانسلر اے۔ جرمن پارلیمنٹ دو پاسیاں بندستاگ تے بندسرات نال رل کے بنی اے۔ بندستاگ دے سنگی ووٹاں نال چنوتی ہون توں بعد ایتھے آندے نیں تے بندسرات دے سنگیاں نوں صوبے چن کے بھیجدے نیں۔ جس پارٹی نوں جنیں ٪ ووٹ لبھدے نیں اوہ اوسے حساب اپنے بندے پارلیمنٹ وچ بھیج سکدے نیں۔ جرمن صدر جرمنی دا وکھالا اے۔ اوہدے کول دسن جوگی طاقت ہوندی اے۔ اج کل ہورسٹ کوہلر جرمنی دا صدر اے۔

جرمنی وچ دو وڈیاں پارٹیاں نیں کرسچن ڈیموکریٹک یونین تے سوشل ڈیموکریٹک پارٹی۔ اج تک جنے وی چانسلر بن اوہ ایہناں دو پارٹیاں چوں ای بنے نیں۔ اک نکی گرین پارٹی وی ہے۔