سر سکندر حیات

آزاد انسائیکلوپیڈیا، وکیپیڈیا توں
Jump to navigation Jump to search
سر سکندر حیات
Sir Sikandar Hayat Khan.png
وزیر اعظم پنجاب
جنمستھان : ضلع اٹک، پنجاب
جمݨ تریخ : 5 جون 1892
مرن تریخ : 26 دسمبر 1942
مرنستھان : لہور، پنجاب
کم : سیاستدان
سیاسی جماعت : یونینسٹ پارٹی
وزیر اعظم پنجاب : 5 اپریل 1937 - 26 دسمبر 1942

سر سکندر حیات پنجاب دے اک سیاستدان سی ۔ اوہ سکندر حیات پنجاب دے ضلع اٹک دے جٹ قبیلے دے نواب حیات خان دے پُتر سن ۔ 5 اپریل 1937 توں 26 دسمبر 1942 پنجاب دے وزیر اعظم رہے ۔ اوہناں دا تعلق یونینسٹ پارٹی نال سی ۔

تعلیم[لکھو]

اوہناں نے علی گڑھ تو مُڈھلی تعلیم تے علیگڑھ مسلم یونیورسٹی توں اعلا تعلیم حاصل کیتی ۔ کچھ چِر لئی میڈیسن دی تعلیم واسطے کنگز کالج لندن گئے پر گھر والےآں نے 1915 وچ واپس بلا لیا ۔

فوج وچ[لکھو]

پہلی عالمی جنگ دے دوران اوہناں نے ابتدائی طور تے اپنے آبائی ضلع اٹک وِچ وار ریکروٹمنٹ فسر دی حیثیت نال کم کیتا ۔ بعد وچ کنگ کمیشن حاصل کرن والے افسر دی حیثیت نال کم کیتا ۔ اوہ اوہناں پہلے ہندوستانی افسراں وچوں اک سی جیہناں نے کنگ کمیشن حاصل کیتا ۔ اوہ 1/2 پنجاب رجمنٹ وچ شامل سی ۔ جنگ عظیم وچ خدمات سر انجام دین دے صلے وچ برٹش انڈیا حکومت نے اوہناں نوں برٹش ایمپائر ملٹری ڈویژن دا ممبر مقرر کر دتا ۔

کاروبار وچ[لکھو]

1920 توں بعد سر سکندر حیات نے اپنا رجحان کاروبار ول کیتا ۔ بہت جلد واہ ٹی اسٹیٹ ، امبرسر قصور ریلوے کمپنی ، سیال کوٹ نارووال ریلوے کمپنی ، اے اے سی واہ ، پیپلز بینک آف نارتھ انڈیا ، پورٹ لینڈ سیمنٹ کمپنی ، واہ سٹون ، لائیم کمپنی میسرز ، پنجاب شوگر کمپنی لمیٹڈ ، لہور الیکٹرک سپلائی کمپنی سمیت ہور بہت سارے کاروباری ادارےآں دے سربراہ بݨے ۔

سیاست وِچ[لکھو]

اوہناں نے مقامی سطح توں سیاست وچ وی قدم رکھیا ۔ اوہ اٹک ڈسٹرکٹ بورڈ دے چیئرمین تے اعزازی مجسٹریٹ وی مقرر ہوئے ۔ 1921 وچ پنجاب قنون ساز اسمبلی دے ممبر بنے ۔ اوہ یونینسٹ پارٹی دے مرکزی لیڈراں وچ شامل سن ۔ 1937 دے الیکشن وچ کامیاب ہو کے پنجاب وچ یونینسٹ پارٹی نے حکومت بنائی تے سکندر حیات پنجاب دے پہلے وزیر اعظم بݨ گئے تے 26 دسمبر 1942 نوں اپݨی موت تک ایس عہدے تے فائز رہے ۔ سر سکندر حیات لہور وچ بادشاہی مسجد دے باہر حضوری باغ دے سامݨے دفن نیں ۔

سر سکندر حیات دی قبر