سلیم بن قیس ہلالی

سلیم بن قیس ہلالی شیخ ابوصادق قیس کوفی دے پُتر تے امام علی ، امام حسن تے امام حسین امام زین العابدین علیہم السلام دے صحابی ہئے ۔ جوانی وچ حضرت عمر دی حکومت دے وخت اچ مدینہ منورہ اچ داخل ہوین ۔ نبی اکرم صلی اللہ علیہ وآلہ وسلم دے صحابیاں تے انصار نال مکمل تعارف دے بعد حضرت علی علیہ السلام نال ہو گئے سن ۔ اناں دا حضرت سلمان ، ابوذر تے مقداد نال بوت زیادہ دوستانہ ہئیا ۔ سلیم بن قیس پیغمبر اکرم صلی اللہ علیہ وآلہ وسلم دی وفات سی بعد اُناں دی سیرتِ طیبہ دے بارے وچ لوکاں کولو پُچھ دے رہین ۔ تے نکے نکے مسئلے بی یاد کر لیندے ہئے ۔

حضرت عمر تے عثمان دے زمانے وچ حدیث تے پابندی ہونڑے دے باوجود آپڑیاں حدیثاں چھُپائے رکھ دے ہئے ۔ امام علی علیہ السلام دے زمانے وچ اناں نوں حقائق لکھنڑیں دا وخت ملا اے ۔ حضرت سلیم جنگ جمل ، صفین تے نہروان وچ بی امام علی علیہ السلام دے نال ہئے ۔تے امام حسن تے امام حسین علیہا السلام دے زمانے وچ بی اناں نے اناں نال ای رہے سن ۔ کربلا دے واقعے دوران اے قید اچ ہئے ۔ امام حسین علیہ السلام دی شہادت دے بعد بی اناں نے امام زین العابدین علیہ السلام دے نال ہئے ۔ سنہ 75ھ وچ حجاج بن یوسف دے ظلم تے ستم سی تنگ آکے ایران ول ہجرت کیتی نے ۔ تے فارس دے ہک ” نوبندجان ” ناں دے شہر وچ رہنڑیں لگے سن۔اس شہر وچ اناں دی ابان بن ابی عباس ناں ولے ہک نڈے نال اناں دا سلام دٰعا ہوئے تے ہک دوسرے نال جان پچھانڑ ہوئی اے ۔ دینی مسئلے سیکھنڑیں دا اناں نوں بوت شوق ہئیا جس دی وجہ نال اناں نے آپڑی زندگی دے آخری دناں وچ امام علی علیہ السلام تے اُناں دے پُتراں تے ودے صحابیاں دے فرماناں نوں ہک کتاب دی شکل وچ لکھا نے ۔سنہ 76ھ وچ سلیم بن قیس دی وفات سی بعد ابان مدینہ گیا اے تے امام زین العابدین علیہ السلام دی خدمت وچ حاضر ہویا تے سلیم بن قیس ہلالی دی لکھی اوی کتاب اناں دی خدمت وچ پیش کیتی نے ۔ امام دے دوصحابیاں کہ جناں دے ناں ابوطفیل کنانی تے عمرابی سلمہ ہئے ، نے ترے دناں وچ اے کتاب پڑھ کے امام علیہ السلام نوں سُنڑاِئی اے ۔ تا امام سجاد علیہ السلام نے فرمایا اللہ انوں بخشے اُنے بالکل سچ کیا وے ۔ اے سارا ساڈا ای کلام اے کہ جنوں اسی جانڑ نے آں ۔ امام علیہ السلام نے اس کتا ب نوں شیعاں دی طرفو پیلی لکھی گئی کتاب دے طور تے تائید کیتی اے ۔ کہ جیڑی بعد اچ ” کتاب سلیم بن قیس ” دے نال مشہور ہئی اے ۔ تے علما دی تو جہ آپڑے ول موڈ لیتی ۔ سلیم بن قیس نوں ہک معتبر شیعہ لکھاری دی حیثیت حاصل اے ۔ اناں دی کتاب دے بار وچ علماء دا نظریہ اے وے کہ اتنے زمانےاس کتاب تے لگنڑیں دے باوجود اے کتاب تحریف سی محفوظ تے امُن وچ اے ۔ ابان بن ابی عیاش ، ابراہیم بن عمر یمانی سلیم بن قیس دے شاگرداں وچوں سن .