نیل ازرق
نیل ازرق اتھوپیا دی جھیل ٹانا توں نکلن آلا اک دریا اے جسنوں اتھوپیا چ ابے تے سوڈان چ نیل ازرق آکھئیا جاندا اے ۔
نیل ازرق سوڈان دے راجگھر خرطوم لاگے نیل ایبض نال مل کے دریاۓ نیل تشکیل دیندا اے جہڑا سوڈان تے مصر توں لنگھدا ہوئیا سکندریہ شہر دے نیڑے رومی سمندر چ ڈگدا اے ۔
نیل ازرق جھیل ٹانا توں نکلن دے بعد اتلے لہندے ول اپنے سفر دا آغاز کر دا اے تے صرف 30 کلومیٹر دے پندھ مگروں اک وڈی گھاٹی چ داخل ہو جاندا اے ۔ ایہہ علاقہ اتھوپیا چ سیاحت دے حوالے نال مشہور اے ۔
جون توں ستمبر دے بارش دے موسم چ نیل ازرق چ پانی دی سطح بوہت ودھ جاندی اے تے دریاۓ نیل نوں دو تہائی پانی فراہم کردا اے ۔ ایہو ای دریا ایتھوپیا دے دریائے اتبارا نال مل کے دریاۓ نیل چ ہڑ دی وجہ بندا رہئیا پر 1970ء چ اسوان ڈیم دی اساری دے نال ای ایس سلسلے دا خاتمہ ہو گئیا ۔
نیل ازرق ، نیل ایبض نالوں لمبائی چ نکا اے اس دے باوجود مصر اپڑن آلا 56 فیصد پانی ایہو دریا فراہم کردا اے ۔
ایہہ دریا سوڈان لئی وی اکو جہی اہمیت دا حامل اے جتھے استے قائم دو ڈیم دیس دی بجلی دی کل پیداوار دا 80فیصد پیدا کردے نیں ۔ اینہاں ڈیماں دی بدولت ای ایس علاقے چ دنیا دی بہترین کپاہ پیدا ہندی اے ۔
