پہلی قومی پنجابی کانفرنس

پہلی قومی پنجابی کانفرنس 28 دسمبر 2014 نوں پنجابی بولی نوں لاگو کرن دی مَنگ لئی لہور وچ ہوئی۔ ایہ کانفرنس سماجی سنگت پنجابی پرچار نے 'پنجابی کیوں ضروری اے' دے سرناویں نال کیتی۔

پنجاب وچ پنجابی نوں لاگو کرن دی مَنگ پراݨی اے۔ 2014 دے آخر تے کئی لوکاں نے اپݨی ایس پراݨی مَنگ نوں حکومت تے عام لوکاں تک اپڑان دی فیر کوشش کیتی۔ ایہناں وچ احمد رضا تے طارق جتالا موہری سن۔ پنجابی کمپلیکس، قذافی سٹیڈیم لہور وچ 100 توں ودھ پنجابی سوجھوان اکٹھے ہوئے تے اک ملن کیتا۔ پنجابی اُتے گل کرن والیاں وچ مشتاق صوفی، طارق گجر، سعید بھٹا، پنجاب اسمبلی دے مِمبر قمراسلام، اشتیاق احمد، جمیل پال، ڈاکٹر اظہر محمود، ریاض احمد شاد، سعید فارانی تے پروین ملک شامل سن۔ کانفرنس دا مڈھ ہیر وارث شاہ دی شاعری توں رکھیا گیا۔ افضل ساحر نے ایس کانفرنس نوں چلایا۔ لوکاں نے پنجاب وچ دوجے صوبیاں ونگوں بالاں لئی سکولاں وچ پنجابی لاگو کرن دا آکھیا۔ گلاں مگروں اک متا ہال وچ بیٹھے لوکاں اگے رکھیا گیا۔

متا

'اج اسیں پہلی قومی پنجابی کانفرنس دے موقعے اتے یو این او دے چارٹر دے مطابق بنیادی انسانی حق مڈھلی تعلیم ماں بولی راہیں حاصل کرن دی مَنگ کردے آں۔ پاکستانی پنجاب دے کروڑ واسیاں دے بالاں نوں ماں بولی وچ مڈھلی تعلیم دتی جاوے۔ ایہ حق سانوں آئین پاکستان وی دیندا اے تے باقی صوبیاں ایس حق نوں من لیا اے۔ کی ایہ حال ایس متے دی منظوری دیندا اے؟'

شاعری

تقریراں تے متے مگروں پنجابی شاعراں انجم قریشی، بابا غلام حسین ندیم، صابر علی صابر بابا نجمی تے افصل ساحر نے اپنی شاعری سنائی۔

ناٹک

فیصل آباد توں آئی ققنس دی اک ناٹک ٹولی نے اپنا ناٹک دکھایا۔ پروفیسر توحید احمد چٹھا ایہدے اگوان سن تے عائشہ سلیم نے ایہدے بارے دسیا۔