قزلباش
قزلباش 13ویں صدی عیسوی چ اناطولیہ تے کردستان چ پھیلے ہوئے نسلا ترک مسلح شیعہ گروہ سن ۔ جنہاں نے بعد چ ایران دی صفوی سلطنت دی اساری دے وادھے چ بہت مدد کیتی ۔ قزلباش دا مطلب ترک بولی چ لال ٹوپی آلے یا لال پہناوے آلے اے ، اصل چ شاہ اسماعیل صفوی دے پیؤ حیدر صفوی نے اپنے منن آلےآں لئی اک لال رنگ دی ٹوپی مقرر کیتی سی ،جس ج 12 اماماں دی نسبت نال 12 کنگرے سن ۔ ترکی زبان چ "قزل" لال رنگ نوں کہندے نیں ، اس لئی ایہہ ٹوپی پان آلےآں نوں قزلباش آکھیا جان لگا ۔ جدوں کہ صفوی اس ٹوپی نوں تاج حیدر آکھدے سن ۔ اینہاں ای قزلباشاں دے نسل اج افغانستان ، ایران ، آذربائیجان ، پاکستان ، شام تے ترکی چ پھیلی ہوئی اے ۔ پاکستان چ قزلباشاں دی وڈی گنتی اثناء عشری شیعہ عقیدے نال تعلق رکھدی اے ۔ پاکستان دا اک صدر یحیی خان وی قزلباش سی ۔