اوٹرانٹو

آزاد انسائیکلوپیڈیا، وکیپیڈیا توں
اوٹرانٹو دے ساحلاں دا دلکش منظر

اوٹرانٹو دکھنی اٹلی دے صوبے لے چے دے زرخیز علاقے چ واقع اک قصبہ اے ، ایہہ جزیرہ نما سالنتو دے چڑھدے حصے چ آبنائے اوٹرانٹو دے کنڈے واقع اے ، جہڑی بحیرہ ایڈریاٹک نوں بحیرہ ایونیئن نال ملاندی اے ۔ ایتھے اک چھوٹی بندرگاہ واقع اے ، جتھے نکے پیمانے تے تجارت ہندی اے ۔ اس قصبے دے چڑھدے دکھن چ 5 کلومیٹر دی دوری تے واقع روشن مینار اٹلی دے چڑھدے چ اخیرلے حصے دی نشاندہی کردا اے ۔

تھوڑے ویلے دا مسلم مل[سودھو]

اوٹرانٹو دے قلعے دا منظر

1480ء چ سلطنت عثمانیہ دا اک بحری بیڑہ شہر دے لاگے لنگر انداز ہوئیا تے اس نے قلعے سمیت پورا شہر فتح کر لئیا ۔ اٹلی دی بھوئیں تے مسلماناں دی اس فتح نے فتح قسطنطنیہ (استمبول) تے پہلے ای بھرے بیٹھے عیسائیاں دے جذببات نوں ہور بھڑکائیا تے یورپ نے مسلماناں نوں شہر توں کڈھن لئی صلیبی جنگ دا اعلان کر دتا ۔ ناپولی دے فرڈینینڈ I نے عیسائی فوجاں نوں اکٹھا کیتا تے ترکاں دے خلاف جنگ لڑی تے 1481ء چ شہر اک وار فینر عیسائیاں دے قبضے چ چلا گئیا ۔ اس جنگ چ شکست دی اک وڈی وجہ سلطان محمد فاتح دے انتقال مگروں نویں سلطان دا اٹلی دی بھوئیں تے ہور پیش قدمی نا کرن دا فیصلہ وی سی ، اس پاروں گنتی دی ودھ ہون دی وجہ توں عیسائی اوٹرانٹو فیر حاصل کرن چ کامیاب ہوگئے ۔ مسلماناں تے عیسائیاں دے وچکار لڑیاں جان آلیاں اینہاں دو لڑائیاں دے نتیجے چ شہر مکمل طور تے تباہ ہو گئیا تے اوس ویلے توں ہن تک اس دی اوہ حثیت بحال نئیں ہو سکی جہڑی رومی سلطنت تے بازنطینی سلطنت دے دور وچ سی ۔ 1537ء چ مشہور عثمانی امیر البحر خیرالدین باربروسا نے اک وار فیر اوٹرانٹو نوں سلطنت عثمانیہ چ شامل کر لئیا پر ایہہ مل وی بوہتا چر قائم نا رہ سکئیا تے عیسائیاں نے اپنا کھوئیا ہوئیا علاقہ واپس , لے لئیا ۔