تسمینہ احمد شیخ

تسمینہ احمد شیخ
(انگریزی وچ: Tasmina Ahmed-Sheikh)
جم	5 اکتوبر 1970 (55 سال)  لندن
وفات
شہریت	برطانیا
مناصب
رکن مملکت متحدہ 56 وین پارلیمان
رکنیت مدت ۷ مئی ۲۰۱۵  – ۳ مئی ۲۰۱۷
منتخبت در	مملکت متحدہ عام انتخابات 2015ء
پارلیمانی مدت	56ویں برطانوی پارلیمنٹ
کونسل آف یورپ کی پارلیمانی اسمبلی کا نمائندہ
دفتر وچ ۲۷ نومبر ۲۰۱۵  – ۲۳ نومبر ۲۰۱۷
عملی زندگی
مادر علمی	یونیورسٹی اف ایڈنبرا سٹراتھسلائڈ یونیورسٹی
پیشہ	سیاست دان ،  اداکار ،  وکیل ،  صحافی
پیشہ ورانہ زبان	انگریزی
اعزازات
افیسر آف دی آرڈر آف دی برٹش ایمپائر (۲۰۱۴)
	IMDB اُتے صفحہ

تسمینہ احمد شیخ، پاکستانی نژاد سکاٹش نیں۔ اوہناں نے سکاٹ لینڈ دی مقامی سیاست وچ سرگرم کردار نبھیایا، ایس توں علاوہ پاکستانی ڈرامیاں چ اداکاری وی کیتی۔

مُڈھلا جیون تے تعلیم

تسمینہ احمد شیخ لندن وچ جمی تے ایڈنبرا وچ پلی۔ اوہناں دی ماں اداکارہ اے تے اوہناں دے والد پہلے پاکستانی تے ایشیائی سی جیہڑے سکاٹلینڈ چ 1986 دے الیکشن چ وارڈ کونسلر چُنے گئے۔ تسمینہ احمد شیخ نے ایڈنبرا وچ کریج ماونٹ ہائی اسکول، جارج ہییوٹس ہائی اسکول تے یونیورسٹی آف ایڈنبرا توں ایم۔اے، سٹراتھسلائڈ یونیورسٹی توں ایل۔ایل۔بی تے قنون چ پوسٹ گریجوایٹ ڈپلومہ حاصل کیتا۔

شوبز کیریئر

قنون چ گریجوایشن کرن توں مگروں پاکستان وچ ہنی مون دے دوران اداکاری کرن دا فیصلہ کیتا۔ اوہنے پاکستانی ڈرامےآں دیس پردیس، آنسو، دی کاسٹل:ایک امید تے ماں وچ اداکاری کیتی تے اوہدی اداکاری نوں پسند کیتا گیا۔

قنونی کیریئر

اوہ گلاسگو لاء فرم ہملٹن برنز وچ سانجھ دار تے کاروباری دستاویز لِکھت (دستاویز انتقال) ، نجی موکل کم ، عائلی قانون تے امیگریشن امور وچ خاص مہارت رکھدیاں نیں۔

سیاسی کیریئر

تسمینہ احمد شیخ سکاٹش کنزرویٹیو پارٹی چ 10 ورھے دی عمر چ سرگرم ہوگئی تے 16 ورھے دی عمر چ اوہدی ممبر بنی۔ اوہ ایڈنبرا سینٹرل ینگ کنزرویٹو دی چیئرپرسن بنی۔ اوہ عورتاں تے گھریلو ٹبریلو امور تے برابر مواقع دین دے امور لئی پارٹی دی ڈپٹی ترجمان بنی۔ اوہ 1999ء دے سکاٹش پارلیمینٹری الیکشن چ پارٹی ولوں گلاسگو گوون حلقے وچ امیدوار بنی پر کامیاب نہ ہو سکی۔ 2000ء چ بوجوہ کنزرویٹیو پارٹی چھڈ دتی تے کچھ چِر لیبر پارٹی وچ رہن تو بعد سکاٹش نیشنل پارٹی جوائن کرلئی۔ جولائی 2012ء وچ یس سکاٹلینڈ ایڈوائزری بورڈ جوائن کیتا تے سکاٹ لینڈ دی ازادی دے ریفرنڈم 18 ستمبر 2014ء وچ سکاٹلینڈ دی ازادی دے حق چ مہم چلائی۔ اوہ مئی 2014ء وچ یورپی پارلیمینٹری الیکشن چ سکاٹش نیشنل پارٹی ولوں امیدواری دی لسٹ وچ تیسری امیدوار سی پر کامیاب نہ ہوسکی۔ مئی 2015ء وچ برطانوی پارلیمینٹری الیکشن وچ سکاٹش نیشنل پارٹی ولوں اوچل & سائوتھ پرتھ شائر دے حلقے وچ امیدوار بنی تے لیبر پارٹی دے امیدوار گورڈن بینکس نوں ہرا کے کامیاب ہو گئی تے ممبر پارلیمینٹ بنی۔ 8 جون 2017ء دے برطانوی پارلیمینٹری الیکشن چ سکاٹش نیشنل پارٹی ولوں فیر ایس حلقے وچوں ای الیکشن لڑیا پر کنزرویٹیو پارٹی دے امیدوار لَک گراہم کولوں ہار گئی۔

خیراتی کم

تسمینہ احمد شیخ عورتاں دی فلاحی تنظیم سکاٹش ایشیئن وومنز ایسوسی ایشن دی بانی تے چیئرپرسن وی اے۔ ایہ تنظیم 19 اپریل 2012 نوں شروع کیتی گئی۔ سکاٹش حکومت نے ایہدے اغاز تے £16,000 دی مالی امداد دتی۔ تسمینہ احمد شیخ نے 2015ء وچ مِمبر پارلیمینٹ بنن توں بعد تنظیم دی ٹرسٹی دے عہدے توں استعفا دے دتا۔

سکینڈل

جنوری 2016ء وچ سکاٹش اخبار ہیرالڈ نے انکشاف کیتا کہ جد تسمینہ احمد شیخ عورتاں دی تنظیم سکاٹش ایشیئن وومنز ایسوسی ایشن دی چیئرپرسن سی اوس ویلے تنظیم دی آمدنی دا صرف %3 حصہ مسحقین چ ونڈیا گیا۔ مئی 2017ء وچ رپورٹ ہویا کہ لاء سوسائٹی آف سکاٹ لینڈ نے اوہناں انتظامی معاملات دی جانچ پڑتال شروع کر دتی اے جیہڑے اوہناں دے دور چ بحیثیت وکیل پریکٹشنر تے ٹرسٹ فنڈ چ مبینہ مالی گھپلیاں نال تعلق رکھدے نیں۔ سکاٹش نیشنل پارٹی دی لیڈر نکولا اسٹرجن نوں ڈاڈھے دباء دا سامݨا کرنا پیا کہ تسمینہ احمد شیخ نوں جون 2017 دے الیکشن چ پارٹی ٹکٹ نہ دتا جاوے تے اوہناں نوں پارٹی وِچوں کڈھ دتا جاوے پر سکاٹش نیشنل پارٹی دی لیڈر نکولا اسٹرجن نے تسمینہ احمد شیخ نوں پارٹی ٹکٹ نہ دین تے پارٹی چوں کڈھن توں انکار کردتا۔

نِجی جیون تے ٹبّر

تسمیہنہ احمد شیخ دی ماں ادھی چیکز تے ادھی ویلش تے والد محمد رضوی اک پاکستانی نیں جیہڑے 1960 دے دہاکے وچ سکاٹ لینڈ گئے۔ اداکارہ تے گلوکارہ سیما رضوی تسمینہ شیخ دی بھین نیں تے پاکستان دے ڈراما ڈائریکٹر، پروڈیوسر تے لکھاری علی رضوی اوہناں دے انکل نیں۔ تسمینہ شیخ دا بیاہ اک پاکستانی ذوالفقار شیخ نال ہویا۔ تسمینہ شیخ تے ذوالفقار شیخ دے 4 نیاݨے نیں۔ اک پُتر، جیہدا ناں سیف اے تے 3 دھیئاں علیزے، شانزے تے ونیزے نیں۔

باہرلے جوڑ

• Profile Archived 2015-03-26 at the وے بیک مشین سکاٹش نیشنل پارٹی دی ویب سائٹ اُتے
• Maiden speech on YouTube

حوالے