دراوڑ
برصغیر پاک و ہند اُتے 2500 سال قبل مسیح دے نیڑے آریا لوکاں نے حملہ کیتا سی۔ اس وقت شمالی ہند وچ دراوڑ نامی نسل دے لوک آباد سن۔ آریاواں نے ایہناں نوں مار کٹ کے جنوب ول دھکیل دتا تے ایہ لوک ایتھے آباد ہوگئے۔ دراوڑ بہت سارے قبیلیاں چ منقسم سن، ہر اک دی اپنی زبان سی پر بنیاد مشترک سی۔
دراوڑ اپنے زمانے دیاں مہذب قوماں چ شمار ہندے سن ، اوہناں تقریبا 4 ہزار قبل مسیح چ زمین توں کنک ، جو ، کپاہ تے گنا اگان تے روئی (روں) توں کپڑا تیار کرن دا راز معلوم کرلئیا سی ، جدوں کہ اس وقت یونان ، سمیریا تے روم دے لوک سوتی پارچہ بافی توں قطعا ناواقف سن ۔ ایہہ لوک تانبے تے کانسی دے اوزار بناندے سن ، لوہے دا استعمال اینہاں نے آریا لوکاں توں سکھیا ۔ آریاواں نے لنگ پوجا ، دھرتی پوجا ،بھوت پریت تے خبیث روحاں دا تصور اینہاں توں ای لئیا تے اینہاں دے بہت سارے دیوی دیوتاواں نوں اپنا لئیا ۔ مورخین دے مطابق کرشن جی وی دراوڑ ای سی کیونجے اسنوں سیاہ فام دسیا گئیا اے ،جدوں کہ آریا سفید فام سن ۔
دراوڑی تمدن کوہستان شوالک توں دریائے تاپتی تے دریائے نربدا تک تے کوئٹہ توں بیکانیر تے کاٹھیا واڑ تک پھیلیا ہوئیا سی ، اسنوں ہڑپائی تہذیب(ہڑپائی رہتل) وی آکھیا جاندا اے کیونکہ اس دے دو مرکزی شہراں چ موہن جو داڑو دے علاوہ ہڑپہ وی سی ۔ بعض علماء آثار قدیمہ نے دراوڑی تمدن دے زمانے دا تعین 2500 ق م تے بعض نے 1750-3250 ق م دے وچکار کیتا اے ، گویا دراوڑی تمدن مصر تے سمیریا دا ہم ،عصر سی ۔