عطا آباد جھیل

آزاد انسائیکلوپیڈیا، وکیپیڈیا توں
Jump to navigation Jump to search
عطا آباد جھیل

عطا آباد جھیل پاکستان دے صوبا گلگت بلتستان دے ضلع ہنزا وچ واقع اک جھیل اے ۔ ایہ جھیل پہاڑ دے اک حِصے دے سِرکݨ ، یعݨی لینڈ سلائیڈ دے نتیجے وچ 2010 وچ وجود وچ ائی سی ۔ ایہ جھیل عطا آباد نامی پنڈ دے کول اے ، جیہڑا کریم آباد توں 22 کلومیٹر شمال وَل واقع اے ۔

لینڈ سلائیڈنگ دا ایہ واقعہ 4 جنوری 2010 نوں پیش آیا سی جد زمین سِرکݨ نال شاہراہ قراقرم دا کچھ حِصا ایہدے وچ دَب گیا تے دریائے ہنزا دا بہاؤ 5 مہینے لئی رک گیا ۔ جھیل دے بݨݨ تے ایہدی سطح بلند ہوݨ نال گھٹ توں گھٹ 6000 افراد بے گھر ہوئے تے 25000 مزید افراد متائثر ہوئے ۔ اس توں علاوا شاہراہ قراقرم دا 19 کلومیٹر طویل حِصا وی اس جھیل وچ ڈُب گیا ۔ جون 2010 دے پہلے ہفتے وچ اس جھیل دی لمبائی 21 کلومیٹر تے ڈونگھ 100 میٹر توں زیادا ہو چُکی سی ۔ اس وقت پاݨی ، زمین دے سِرکݨ نال بݨݨ والے عارضی بَند دے اُپروں ہو کے وگݨ لگ گیا ۔ تاہم اس وقت تک ششکٹ دا تھللا حِصا تے گلمت دے کچھ حِصے زیر آب آ چُکے سی ۔ وادی گوجال سلھاب نال سَبھ توں زیادا متائثر ہوئی ، جِتھے 170 توں زیادا گھر تے 120 توں زیادا ہٹیاں سلھاب دی نذر ہوئیاں ۔ شاہراہ قراقرم دے بند ہوݨ نال خوراک تے دیگر ضروری ساز و سامان دی قِلت پیدا ہو گئی ۔ 4 جون 2010 نوں جھیل چوں نِلکݨ والے پاݨی دی مقدار 3700 معکب فٹ فی سکینٹ ہو چُکی سی ۔ حکومتی ادارےآں دے مطابق کِسے وی وڈے سلھاب دے امکانات بہت کَعھٹ سی ۔


شاہراہ قراقرم دا کچھ حِصا اس لینڈ سلائیڈنگ دی وجہ نال زیرآب آگیا ۔ 14 ستمبر 2015 نوں وزیر اعظم پاکستان نواز شریف نے عطا آباد بیریئر جھیل اُتے 5 سرُنگاں تے مُشتمل شاہراہ قراقرم دے 24 کلومیٹر (15 میل) ٹُکڑے دا اِفتتاح کیتا ۔ 5 سرُنگاں ، اِکو ساتھ ، 7 کلومیٹر (3.3 میل) لمبی ، شاہراہ قراقرم (کے کے ایچ) دے 24 کلومیٹر (15 میل) لمبے ٹکڑے دا حِصا نیں جیہڑا 2010 وچ عطا آباد وچ لینڈ سلائیڈنگ نال متاثر ہو گیا سی ۔ ری الائنمنٹ پروجیکٹ اک تعمیراتی شاہکار اے جیہڑا 275 ملیئن ڈالر دی لاگت نال مکمل ہویا اے ۔ اس منصوبے نال پاکستان تے چین دے مابین روڈ رابطا بحال ہوگیا اے ۔