منور سعید

منور سعید
جنمستھان :	امروہا، برٹش انڈیا
جمݨ دیہاڑا :	1 جولائی 1941
قومیئت :	پاکستانی
کم :	اداکار، لکھاری

منور سعید پاکستان دے مشہور اداکار نیں ۔ اوہناں نے ڈراما ، فلم ، ریڈیو تے تھیٹر تے کم کیتا ۔ اوہ 1 جولائی 1941 نوں امروہا وچ جمے تے 1960 وچ اپݨے ٹبر سمیت پاکستان آ گئے ۔

پڑھائی لکھائی

منور سعید نے علیگڑھ مسلم یونیورسٹی توں بی ایس کیتی ۔ اوہناں دے ابا جی اوہناں نوں انجینرنگ کرواونا چاوہندے سی پر منور سعید دا شوق اداکاری ول سی ۔ اداکاری دے نال نال اوہناں نے اپݨے ابا جی دی خواہش تے 1964 ء وچ گورنمنٹ کالج آف ٹیکنالوجی وچ داخلا لے لیا ۔ اوتھوں انجینرنگ دی تعلیم حاصل کیتی ۔

پیشا ورانا جیون

منور سعید نے پاکستان کراچی وچ منتقل ہو کے 1961 ء وچ اک ڈراما دربار اکبری کیتا جیہدے وچ اکبر دا کردار ادا کیتا ۔ اوس ویلے دے ریڈیو دے پروڈیوسر ذاکر حسین نے ڈراما دیکھݨ توں بعد منور سعید نوں اوہناں دی چنگی آواز پاروں ریڈیو جوائن کرن دا مشورہ دتا ۔ اوتھوں منور سعید دا ریڈیو دا کیریئر شروع ہویا ۔ پاکستان آوندے ای تھیٹر وی کرن لگ گئے تے ریڈیو وی ۔ ایس توں علاوہ اک آٹا مِل وچ رات دی نوکری وی کر لئی ۔ جتھے مِلر دے طور تے کم کیتا ۔ نائٹ شِفٹ رات 11 بجے توں سویرے 7 بجے تک سی تے 100 روپے مہینا وار تنخواہ مِلدی سی ۔ منور سعید نے اپݨے ابا جی دی خواہش تے 1964 ء وچ گورنمنٹ کالج آف ٹیکنالوجی وچ وی داخلا لے لیا ۔ اوتھوں انجینرنگ دی تعلیم حاصل کیتی تے ٹاپ کر لیا جیہدی وجہ توں منور سعید نوں کالج وچ ای لیکچرار دی نوکری مل گئی ۔ 1967 ء وچ جد کراچی وچ ٹیلی وژن آیا تاں اوہنوں فنکاراں دی لوڑ سی ۔ ریڈیو تے تھیٹر دے فنکاراں نوں بلایا گیا ۔ ایس طرحاں منور سعید نے ٹیلی وژن تے وی کم کرنا شروع کر دِتا ۔ ٹیلی وژن تے اوہناں دا پہلا ڈراما مجرم سی ۔ کراچی ٹیلی وژن تے اوہناں دا سبھ توں مشہور ڈراما آزادی کے مجرم سی ۔ جیہدے وچ منور سعید نے محمد علی جوہر دا کردار ادا کیتا ۔ ٹی وی تے کم کرن دے نال نال پڑھاوندے وی رہے ۔ جد ڈرامے کیتے تاں لوکاں نے بہت پسند کیتے تے کامیابی مِلݨ تے اوہناں دے ابا جی وی خُش ہوئے ۔ 1970ء وچ اوہناں دے ڈرامے لہور وچ فلم نال تعلق رکھݨ آلے کچھ لوکاں نے دیکھ لئے ۔ فیر اوہناں نے منور سعید نوں کراچی توں لہور بلا لیا ۔ منور سعید اپݨے ابا جی کولوں اجازت لے کے لہور چلے گئے تے لہور وچ فلماں وچ کم شروع کر دتا ۔ کراچی وچ سرکاری نوکری توں عارضی چھٹی لئی ہوئی سی ۔ جد فلم وچ کامیابیاں مِلیاں تے لہور وچ پیر جم گئے تے فیر کراچی وچ سرکاری نوکری توں استعفا دے دتا ۔ اوس توں بعد فلماں وچ بہت کم کیتا ۔ اوہناں نے اردو تے پنجابی دوواں فلماں وچ کم کیتا ۔ پنجابی فلم ماں دا لال اوہناں دی پہلی فلم سی جیہدے ڈائریکٹر ایم جے راݨا سی ۔ لہور فلماں دے نال نال ڈرامےآں وچ وی کم کیتا ۔ منور سعید تقریبن 40 ورھے لہور وچ رہے ۔ اوہناں نوں لہور وچ بہت عزت ، شہرت تے کامیابی مِلی ۔ ضیاءالحق دے دور وچ فلم انڈسٹری زوال دا شکار ہوگئی تے منور سعید ٹبر سمیت واپس کراچی چلے گئے ۔ فیر پرویز مشرف دا دور آیا تاں بہت سارے پرائیویٹ چینلز شروع ہو گئے تے ٹی وی ڈرامےآں دا کم بہت زیادہ ودھ گیا ۔ منور سعید نے فیر ڈرامےآں وچ کم کرنا شروع کر دتا ۔

مشہور ڈرامے

• وارث
• اندھیرا اجالا
• مرزا اینڈ سنز
• الاؤ
• زمانہ
• بڑھتے سائے
• بے زبان

اعزازات

حکومتِ پاکستان نے منور سعید نوں 14 اگست 2002 ء نوں صدارتی اعزار تمغا حسن کارکردگی ( پرائِڈ آف پرفارمنس ) عطا کیتا ۔