وڈا ٹوکان

عام ٹوکان / وڈا ٹوکان
دیس:	جنور
برادری:	کورڈیٹ
ٹولی:	پنچھی
پتی:	لکڑ ٹک
ٹبر :	ٹوکان
سائینسی ناں:	Ramphastos toco

وڈا ٹوکان یا عام ٹوکان، ٹوکان ٹبر دا سب توں وڈا پنچھی اے۔ ایہ ٹوکان ٹبر دا عام ملن والا تے سب توں زیادھ ویکھیا جانوالا ٹوکان اے۔ ایہ چڑھدے تے وشکارلے دکھنی امریکہ وچ ملدا اے تے چڑیا گھراں وچ عام رکھیا جاندا اے۔

وکھالہ

ایس ٹوکان دے پر تیز رنگاں وچ نیں۔ پنڈا کالا، گاٹا، چھاتی تے اپرلے پچھلے پر چٹے نیں۔ اکھاں دے دوالے کھل نیلی تے اوس دے دوالے کھٹے نیں۔ سب توں اہم کل ایہدی 15.8 توں 23 سینٹی میٹر (6.2 توں 9.1 انچ) لمی چنج اے۔ ایہ پیلے کھٹے رنگ دی ہوندی اے۔ اپنے مڈھ تے انت تے ایہدے تے کالا نشان ہوندا اے۔ چنج لگدی بھاری اے پر دوجے ٹوکاناں وانگوں وچوں کھوکھلی ہون باہجوں ہلکی ہوندی اے۔ ایہدی جیب وی اینی لمی ہوندی اے جنی کہ چنج۔

ٹوکان ٹبر وچ ایہ سب توں وڈا اے تے ایہدی لمبائی 55–65 سینٹی میٹر (22–26 انچ) ہوندی اے۔ ایہناں دا پنڈا جوکھ 500 توں 876 گرام ہوندا اے۔ نر دا مدرا جوکھ 723 گرام تے مادھ جیہڑی نکی ہوندی اے اوہدا مدرا جوکھ 576 گرام اے۔ جوکھ نوں چھڈ کے نر مادھ دے وشکار ہو کوئی وکھراپا نہیں دسدا۔ نکے بجے ہلکے رنگاں دے ہوندے نیں۔

عام ٹوکان

پسار

ایہدا اصل دیس دکھنی امریکہ اے تے ایتھے ایہ چڑھدے بولیویا، دکھن چڑھدے پیرو، اتری ارجنٹائن، چڑھدے تے وشکارلے پیراگوے تے برازیل وچ ملدا اے۔ ایہ دنیا دے چڑیا گھراں وج عام رکھیا جاندا اے۔

عام ٹوکان جنگلاں دے بجاۓ کھلے تھانواں تے جتھے کتے کتے رکھ ہون رہنا پسند کردا اے۔ ایہ نیویاں تھانواں دا پنجھی اے پر 1750 میٹر دی اچائی تے انڈیز دے پربت دھارے وچ وی ملدا اے۔ ایہ اک لمے چوڑے علافے دا واسی اے تے ایس لئی ایہدے مکن دا کوئی ڈر نہیں۔

کھان پین

ایہ فروٹ، کیڑے ڈڈو، کرلے، نکے پنچھی تے اوہناں دے انڈے بجے کھاجاندا اے۔لمی جنج ناں اوہ چیزاں وی پھڑ لیندا اے جیہڑیاں پوہنج توں باہر ہون۔ ایہدے نال اوہ فروٹ دی جھل لاندا اے تے شکاریاں نوں نساندا اے۔

ورتن

ایہ عام ویکھن وچ جوڑے یا نکیاں ٹولیاں وچ ریندا اے۔ آڈدیاں ایہ تیز پر مار کے یا فیر پر کھول کے ہوا اتے تلکدا اے۔ ایہ کوئی چنکے اڈن والے نیں بس جھالاں ما کے اک رکھ توں دوجے رکھ تے ٹر جاندے نیں۔ ایہناں دا آلنا کسے رکھ دے اتے کھڈ وچ ہوندا اے۔ ایہ زمینی کنڈیاں تے وی کھڈاں وچ ریندے ویکھے گۓ نیں۔ ایہ سلانہ بچے کڈدے نین تے مادھ 2 توں 4 تک آنڈے دیندی اے۔ آنڈیاں تے نر مادھ دونویں بیٹھدے نیں تے 17–18 دناں مگروں بجے نکل آندے نیں۔ ایہ پنچھی اپنے بجے دی جنگی سامبھ کردے نیں۔

لمی چنج ایہدی سہنپ اے تے گرمی کڈھن دا اک ول وی اے۔ چنج ایدی کل پدھر تھاں دا 30 توں 50٪ بندی اے۔

بارلے جوڑ

• وڈیو
• ایس ٹوکان دیاں ٹکٹاں

اتہ پتہ