آنگ سان سوچی

وکیپیڈیا توں
(لیایا گیا آنگ سان سو کئی)
جاؤ: پاندھ, کھوج
آنگ سان سو کئی
جمی: 19 جون 1945
کم : امن
نوبل انعام لیا : 1991

آنگ سان سو چی برما دی حمہوریت دی بحالی لئی کم کرن آلی تے سیاسی جماعت نیشنل لیگ فار ڈیموکریسی دی آگو اے ۔ اسنوں 1991 چ امن اچ نوبل انعام دتا گیا۔

دکھنی افریقہ دے آگو نیلسن منڈیلا وانگوں آنگ سان سوچی جبر دے خلاف پرامن کوششاں دی سارے جگ وچ نشانی بن چکیاں نیں۔ پینٹھ سالاں دی آنگ سان سوچی نے ملک وچ جمہوریت لئی جتناں وچ اپنی حیاتی دے پچھلے اِکی سالاں وچوں پندراں سال بندی وچ لنگھائے نیں۔

آنگ سان سوچی برما دی آزادی دے ہیرو جنرل آنگ سن دی دھی ہے۔ جنرل آنگ سن نوں انی سو سنتالی وچ ملک نوں اقتدار اعلیٰ دی منتقلی وچ قتل کر دتا گیا سی۔ پیو دے قتل دے ویلے آنگ سان سوچی دی عمر صرف دو سال سی۔ آنگ سان سوچی انی سو سٹھ وچ پہلی واری بھارت گئیاں جتھے اوہناں دی ماں نوں سفیر برما لایا گیا سی۔

انی سو چوٹھ وچ آنگ سان سوچی پہلی آکسفورڈ یونیورسٹی اپڑیاں جتھے اوہناں نے فلسفے ، سیاست تے اکنامکس دی تعلیم پائی۔ آکسفورڈ یونیورسٹی وچ تعلیم وچ ہی آنگ سان سوچی دی اپنے جیون ساتھی مائیکل ایرس نال ملنی ہوئی۔ کجھ چر تیکر جاپان تے بھوٹان وچ رہن دے مگروں آنگ سان سوچی نے برطانیہ وچ مستقل رہن دا فیصلہ تے اک گھروکی ماں وانگوں اپنے بالاں ، الیگزینڈر تے کم نوں پالیا۔

برطانیہ وچ رہندیاں ہوئیاں آنگ سان سوچی برما نوں اپنے خیالاں چوں نہ کڈھ سکیاں تے انی سو اٹھاسی وچ اپنی بمار ماں دا حال پچھن لئی واپس برما اپڑ گئیاں۔ اوہناں نے برما وچ اپڑ کے تقریر وچ کہیا پئی برما وچ جو کجھ ہو رہیا ہے ایہدے نال سانگا نہیں توڑ سکدی۔

برما واپس اپڑن دے مگروں آنگ سان سوچی نے ملک وچ جمہوریت لئی کوششاں شروع کیتیاں۔ آنگ سان سوچی نے مارٹن لوتھر تے مہاتما گاندھی دے عدم تشدد دے فلسفے تے عمل کردیاں ہوئیاں سارے جگ وچ امن والیاں ریلیاں کڈھیاں تے ملک وچ جمہوریت دیاں کوششاں جاری رکھیاں پر فوجی حکمراناں نے طاقت نوں بے دھڑک ورت کے اوہناں دی امن والی جدوجہد نوں دب کے رکھ دتا۔ انی سو نوے وچ ہون والیاں چوناں وچ آنگ سان سوچی نوں نااہل متھن تے پھڑن دے مگروں وی اوہناں دی سیاسی جماعت نے چوناں وچ بھرویں کامیابی پائی۔

برما دے فوجی حکمراناں نے انی سو اکانوے وچ اوہناں دی جماعت نیشنل لیگ فار ڈیموکریسی دی کامیابی نوں منن توں نانہہ کر دتی تے آنگ سان سوچی نوں پھڑ لیا۔ بندی وچ ہی آنگ سان سوچی نوں امن دا نوبل انعام دتا گیا۔ نوبل انعام کمیٹی وچ رلتی فرانس سیجسٹیڈ نے آنگ سان سوچی نوں لسیاں دی طاقت ' آکھیا سی۔

دوہواں دھاکیاں وچ پہلی واری چوناں وچ آنگ سان سوچی نوں چوناں وچ حصہ لین دی اجازت نہیں سی پر ایہدے مگروں وی اج وی اوہ برما دے لوکاں لئی آس دی نشانی ہے۔

آنگ سان سوچی نوں انی سو پچانوے وچ چھڈ دتا گیا پر اوہناں دی آؤنی جانی تے روکاں لائیاں گئیاں۔ دو ہزار نو وچ آنگ سان سوچی نوں بندی دی خلاف ورزی دے الزام وچ اٹھاراں مہینیاں دی سزا سنا دتی گئی۔

آنگ سان سوچی نے اپنی پکڑ وچ ملکی حالات تے گوہ کرن توں علاوہ جاپانی تے فرانسیسی بولی وچ وی مہارت دیاں کوششاں کیتیاں۔

اجوکے سالاں وچ آنگ سان سوچی نوں اپنی بندی وچ اپنی جماعت دے آگواں تے اُچیچا سفارت کاراں نال ملن دی اجازت ملدی رہی۔

برما دے فوجی حکمراناں نے آنگ سان سوچی نوں ملک توں باہر علاج لئی گھلن دیاں وی کئی پیشکشاں کیتیاں پر اوہناں منن توں نانہہ کر دتی تے برما وچ رہن نوں ترجیح دتی۔

آنگ سان سوچی بندی وچ ہی دادی بن گئیاں پر اوہ اج تیکر اوہناں نال ملنی نہیں کر سکیاں۔

اجوکے مہینیاں وچ اوہناں ولوں چوناں دا بائیکاٹ کرن دے فیصلے دی نکھیدی کیتی گئی۔ اوہناں دی جماعت دا کہنا سی جو چوناں دے قانون نتارویں نہیں ہین۔ اوہناں دی سیاسی جماعت دے کجھ رکناں نے آنگ سان سوچی دی جماعت توں وکھ ہو کے نویں جماعت بنائی تے چوناں وچ حصہ لیا۔

ہور ویکھو[لکھو]