ٹیک سنگھ
| ٹیک سنگھ | |
| نام : | سردار ٹیک سنگھ |
| جمݨستھان : | ڈھوس، چونیاں، پنجاب |
| جمݨ تریخ : | 1800ء ~ |
| مرن : | انیہویں صدی |
| قوم : | پنجابی |
| ماں بولی : | پنجابی |
| ذات : | جٹ |
| گوت : | سِدھو |
| والد : | سردار کرم سنگھ |
| گُݨ : | لوک سیوک |
| ملکیت : | جاگیر (44000 مربعہ) وڈا رسالہ |
ٹیک سنگھ (Tek Singh)، پنجاب وچ چونیاں دے کول اک پنڈ ڈھوس توں تعلق رکھدے سن جو ہُݨ پنجاب، پاکستان دے ضلع قصور دی تحصیل چونیاں وچ واقع اے۔
سردار ٹیک سنگھ مہاراجا رنجیت سنگھ دے راج وچ ٹوبھا ٹیک سنگھ دے علاقے وچ 44000 مربعہ جاگیر دے مالک سن۔ اس توں علاوہ مہاراجا رنجیت سنگھ دی فوج وچ اوہناں دا اک وڈا رسالہ سی۔
سردار ٹیک سنگھ نے اپݨی جاگیر وچ لوکائی دی بھلائی واسطے بہت سارے کم کروائے۔ شورکوٹ تے لہور دے درمیان تے جھنگ مگھیاݨا تے کوٹ کمالیہ دے درمیان آؤݨ جاݨ لئی سڑکاں اوہناں دی جاگیر وچوں لنگھدیاں سن تے موجودہ شہر ٹوبھا ٹیک سنگھ دے مقام اُتے ایہناں سڑکاں دا چوراہا سی۔ سردار ٹیک سنگھ نے ایتھے مسافراں تے اوہناں دے ڈنگراں لئی پاݨی فراہم کرن واسطے اک وڈا ٹوبھا بݨوایا جیہنوں "ٹوبھا ٹیک سنگھ" کہیا جاݨ لگ گیا۔ پنجاب اُتے برطانوی راج آؤݨ مگروں اس علاقے وچ نہری نظام شروع کیتا گیا تے ریلوے لائناں بچھائیاں گئیاں۔ کچیاں سڑکاں دے اس چوراہے تے ٹوبھے کول 1900ء دے لگ بھگ اک وڈا ریلوے اسٹیشن تعمیر کیتا گیا جیہدا نام ٹوبھا ٹیک سنگھ ریلوے اسٹیشن رکھیا گیا۔ بعد وچ ایتھے آبادی ودھدی گئی، پہلاں قصبہ فیر ایہ شہر دی شکل اختیار کرگیا۔ 1904ء وچ تحصیل ٹوبھا ٹیک سنگھ دا صدر مقام تے 1982ء وچ ضلع ٹوبھا ٹیک سنگھ دا صدر مقام بݨ گیا۔
ٹوبھا ٹیک سنگھ دے سرناویں نال مشہور افسانا نگار سعادت حسن منٹو نے 1955ء وچ ٹوبھا ٹیک سنگھ (افسانا) لکھیا۔ قیام پاکستان توں بعد سِکھ ایتھوں ہجرت کرکے چڑھدے پنجاب چلے گئے لیکن سردار ٹیک سنگھ دے عوامی فلاح و بہبود دے کمّاں تے اوہناں دی نیک نامی دی وجہ توں ایہ نام برقرار رہیا۔ اس شہر دے نام نوں چڑھدے پنجاب تے لہندے پنجاب وچ تاریخی حیثیت حاصل ہوگئی تے ایہ نام سکھ مسلم بھائی چارے دی اک لازوال مثال بݨ گیا جس طرحاں چڑھدے پنجاب وچ فرید کوٹ دا نام اے۔ ٹوبھا ٹیک سنگھ دے نام نال کئی ٹیلی ویژن ڈرامے تے فِلماں بݨ چُکیاں نیں۔