دارا اول

دارا اول

دارا اول دا جاری کردہ سکہ دارک جس دے سونے دی کوالٹی95اعشاریہ83 فیصد خالص سی

اک یونانی مصر دی چوتھی صدی قبل مسیح چ بنائی گئی دارا اول دی تصوراتی مورت

بیران چ نقش رستم چ حخمانیشی سلطنت دے دوجے بادشاہاں نال دارا دا مزار

دارا اول (دور حکومت:521 ق م- 486 ق م) (دارا داراب دا محفف اے تے یونانی چ داریوش دے ناں نال جانئیا جاندا اے ) ایران دا اک عظیم شہنشاہ تے فاتح سی ۔ اوہ حخمانیشی سلطنت دے شہنشاہ گستاسپ دا پتر سی ۔ دارا کمبوجیا دے مرن دے مگروں تے تخت تے مل مارن آلے گومتا دے قتل دے بعد مدائن چ تخت تے بیٹھا ۔ پہلے 3 سال اوہ اندرونی بغاوتاں نوں مکان چ لگا رہئیا تے فیر سلطنت کماں چ بہتری ول متوجہ ہوئیا ۔ اس نے اپنی سلطنت نوں 28 صوبےآں چ ونڈئیا ، جنہاں چ گندھارا ، مکران ، بلوچستان ، عرب تے مصر قابل ذکر نیں ۔ ہر صوبے چ اک دی بجائے 3 حاکم " گورنر ، جنرل تے وزیر " مقرر کیتے ۔

دارا پہلا ایرانی حکمران سی جس نے " سونے" دے سکے رائج کیتے ۔ سوسا توں ساردیس ( ایشیائے کوچک ) تک 15 سو میل لمبی سڑک بنوائی ۔ اک نہر پٹ کے بحیرہ روم نوں بحیرہ احمر نال ملائیا ۔ اسنے 80 ہزار فوج لے کے سلیتھیا قوم تے حملہ کیتا تے دریاۓ ڈینیوب دے دہانے تک پہنچ گئیا تے واپسی تے تھریس تے مقدونیہ تے قبضہ کیتا ۔ کجھ چر مگروں چڑھدے ول رخ کیتا تے پنجاب تے سندھ نوں اپنی سلطنت چ شامل کر لئیا ۔ اس دے اک جرنیل سکائی کس نے سکندر اعظم توں ڈیڑھ سو سال پہلے دریائے سندھ دا شمال توں جنوب تک سفر کیتا ۔ اس دے عہد چ ایشیائے کوچک ، اتلا یونان ، مصر ، عرب ، شام ، عراق ، افغانستان تے سندھ تے پنجاب ایرانی سلطنت دا حصہ سن ۔ جگ چ اینی وڈی سلطنت فیر کدے وی قائم نا ہوئی ۔ دارا دا دکھنی راجگھر پرسی پولس یاں استخر سی اس دے کارنامے استخر تے کوہ بے ستون دیاں چٹاناں تے کندہ کیتے گئے سن ۔ دارا زرتشتی مذہب دا منن آلا سی ۔