شیام

شیام
جم	20 فروری 1920   سیال کوٹ
تاریخ وفات	25 اپریل 1951 (31 سال)
عملی زندگی
پیشہ	اداکار
پیشہ ورانہ زبان	پنجابی
	IMDB اُتے صفحات

سُندر شیام چڈا برٹش انڈیا دے پنجابی اداکار سن۔ اوہناں نے اپݨی فلمی زندگی دا آغاز 1942ء وچ کیتا تے اپݨی وفات 1951ء تک کئی فلماں وچ اداکاری دے جوہر دکھائے۔ اوہناں د‏‏ی وفات 1951ء وچ فلم شبستان د‏‏ی شوٹنگ دے دوران ہوئی سی۔

ابتدائی زندگی تے کیریئر

سندر شیام چڈا 20 فروری 1920 نون سیال کوٹ، پنجاب وچ پیدا ہوئے لیکن راولپنڈی وچ پݪے ودھے، شیام نے گورڈن کالج راولپنڈی توں گریجوئیشن کیتا۔ اوہ سعادت حسن منٹو دے قریبی دوست سی تے اوہناں د‏‏ے لکھے افسانیاں تو‏ں متاثر سی۔ 1947 وچ پاکستان بݨݨ مگروں وی اوہناں دی دوستی مضبوط رہی۔

شیام دے فلمی کیریئر دا آغاز 1942 وچ پنجابی فلم گوانڈھی توں ہویا۔ 1944 وچ، اوہ بمبئی چلے گئے تے ہندی فلماں وچ اداکاری شروع کیتی۔ اوہناں نے اس وقت دیاں کئی سرکردہ اداکاراواں جِداں نرگس، نگار سلطانہ، ثریا تے نلنی جیونت دے مقابل کم کیتا۔ اوہناں دیاں سبھ توں مشہور فلماں وِچوں اک بازار سی، جو 1949 وچ ریلیز ہوئی، جیہدے وچ اوہناں نے نگار سلطانہ ناݪ اداکاری کیتی۔ اوہناں دیاں کچھ ہور قابل ذکر فلماں وچ نردوش (1941)، ڈبلیو زیڈ احمد دی من کی جیت (1944)، مجبور (1948) چار دن (1949)، دل لگی (1949) پتنگا (1949)، چاندنی رات (1949)، مینا بازار (1950)، سمادھی (1950) تے اوہناں دی آخری فلم شبستان (1951) سی، جیہدے وچ نسیم بانو دے مدمقابل اداکاری سی، جو اوہناں دی موت توں بعد 1951 وچ ریلیز ہوئی۔

نِجی جیون

شیام نے اک خاتون ممتاز قریشی ("تاجی") ناݪ ویاہ کیتا تے اوہناں دے دو نیاݨے وی ہوئے، دھی ساحرہ تے اک پُتر، شاکر سی۔ 1951 وچ گھڑ سواری دے دوران اک حادثے وچ شیام دی اچانک موت توں بعد ممتاز اپݨی وڈی بھݨ زیب قریشی دے ناݪ پاکستان آگئیاں تے لہور وچ آباد ہو گئیاں۔ ممتاز نے بعد وچ انصاری نامی اک شخص ناݪ ویاہ کیتا۔ شیام دے دونوں نیاݨے پاکستان وچ پݪے ودھے۔ شیام دی دھی ساحرہ کاظمی اپݨے والد دے نقش قدم اُتے چلدے ہوئے پاکستانی ٹی وی سیریلز وچ کم کردے ہوئے اداکارہ بݨیاں، اوہناں دا ویاہ 1974 وچ پاکستانی ٹی وی اداکار راحت کاظمی ناݪ ہویا۔ اوہناں دے دو نیاݨے، علی کاظمی (پُت) تے ندا کاظمی (دھی) نیں۔ شیام دے پُتر شاکر نے اعلا تعلیم حاصل کیتی تے اوہ برطانیا وچ مقیم ماہر نفسیات نیں۔

موت تے میراث

شیام 1951 وچ 'شبستان' دے سیٹ اُتے اس وقت انتقال کر گئے جد اوہ فلم بندی دے دوران گھوڑے توں گر گئے تے اوہناں دے سر وچ فریکچر ہو گیا۔ اوہناں نوں فوری طور تے ہسپتاݪ لجایا گیا لیکن اوہ جانبر نہ ہوسکے۔ اوہناں دے چند باقی مناظر اک باڈی-ڈبل دے ناݪ مکمل کیتے گئے جیہدا قد اوہناں ناݪ مݪدا جݪدا سی، اوہناں دا چہرہ دکھائے بغیر فلمایا گیا۔ اس فلم دی شوٹنگ بمبئی وچ ہو رہی سی۔

ہُݨ تک ایہ قیاس کیتا جارہیا اے کہ جے اوہ لمبا چر زندہ رہندے تاں اپݨی خوبصورتی دی وجہ توں 1950 دی دہائی دے مشہور فلمی ہیروز دلیپ کمار، دیو آنند تے راج کپور دا مقابلہ کردے۔

ہور دیکھو

• ساحرہ کاظمی
• راحت کاظمی
• علی کاظمی

حوالے