چک 44 باراں ایل

وکیپیڈیا توں
Jump to navigation Jump to search
چک 44 باراں ایل
پاڑی بنگلہ
Jungle in Punjab.JPG
دیس: پاکستانFlag of Pakistan.svg
ضلع: ساہیوال
تصیل: چیچہ وطنی
بولی: پنجابی
یونین کونسل: 63
صوبائی اسمبلی حلقہ: پی پی 248
منتخب رکن صوبائی اسمبلی: وحید اصغر ڈوگر
قومی اسمبلی حلقہ: این اے 162
منتخب رکن قومی اسمبلی: رائے حسن نواز خاں
کل ووٹر: 4 ہزار
لوک گنتی: 10 ہزار
وسوں رقبہ: تقریبا 65 کلّے (ایکڑ)
کاشتکاری لئی رقبہ: 64 مربعے

چک 44 باراں ایل (یعنی نہر لوئر باری دوآب دے کھبے پاسےاوں نکلن آلی 12ویں نہر تے 44واں پنڈ ، ایل یعنی Left یعنی کھبا پاسا ) ضلع ساہیوال دی تحصیل چیچہ وطنی دا اک پنڈ اے ۔ جہڑا چیچہ وطنی شہر توں 8 کلومیٹر دکھن چ نہر 12 ایل دے چڑھدے کنڈے واقع اے ۔ اس دا ناں پاڑی بنگلہ اے ، جہڑا نیر 12 ایل توں نکلن آلے لنڈو تے واقع اک نہری بنگلے دے ناں تے اے ، تے اس دا پنڈ نمبر 44 اے ۔


آلادوالا[لکھو]

چک 44 باراں ایل چ بوڑھ دا اک رکھ

چک 44 باراں ایل تحصیل چیچہ وطنی دا اک مشہور پنڈ اے ، جہڑا چیچہ وطنی شہر توں 8 کلومیٹر دکھن چ واقع اے ۔ اس دے چڑھدے چ چک 33 باراں ایل (خضر پور) تے چک 34 باراں ایل ، اتلے چ چک 42 باراں ایل ، چک 40 باراں ایل تے چک 109 باراں ایل ، لہندے چ ُچک 43 باراں ایل تے چک 108 باراں ایل تے دکھن چ چک 32 باراں ایل ، چک 31 گیاراں ایل تے چک 45 باراں ایل (فردوس) واقع نیں ۔ 44 باراں ایل دے لہندے پاسے لوئر باری دوآب توں نکلن آلی نہر 12 ایل وگدی اے تے 44 باراں ایل دیاں زمیناں ایسے نہر دے پانی نال سیراب ہندیاں نیں ۔

تریخ[لکھو]

ضلع ساہیوال دا علاقہ زمانہ قدیم توں آباد چلئیا آ رہیا اے تے ہڑپہ دے قدیم آثار وی ایتھے ای لبھے نیں جہڑے کہ 3 ہزار قبل مسیح توں وی پرانے نیں ۔ ایہہ علاقہ چیچہ وطنی تے اسدے پنڈاں دے لاگے ای اے ۔ جس توں ثابت ہندا اے کہ اینہاں علاقےآں چ انسان دی رہتل پرانےآں ویلےآں توں ای چلی آ رہی اے تے ایہہ علاقے انسان دی ابتدائی رہتلاں چوں اک نیں ۔

پر اس علاقے دی نویں آباد کاری انگریزاں نے کیتی ۔ 1912ء چ نہر لوئر باری دوآب دی اساری دے نال ای اوس ویلے دے پنجاب دے انگریز لفٹینینٹ گورنر نے اس علاقے دی آباد کاری دا منصوبہ بنائیا تے لوئر باری دوآب توں نہراں کڈ کے ایتھے دیاں پانی دکھوں بے آباد زمیناں آباد کرن لئی نویں پنڈ آباد کیتے تے چڑھدے پنجاب دے مختلف ضلعےآں توں لوکاں نوں لیا کے اوہناں نوں زمیناں دے کے ایتھے آباد کیتا ۔

چک 44 باراں ایل چ آباد کیتے گئے بوہتے لوک چڑھدے پنجاب دے ضلع ہوشیارپور دے مختلف پنڈاں دے رہن آلے جٹ سن ۔ اینہاں دے ٹبراں دا ادھا حصہ ہوشیار پور دے پنڈاں وچ ای رہئیا تے ادھا ایتھے آباد ہوگیا تے سن 47ء دے اجاڑےاں دے بعد اینہاں ٹبراں دے ہوشیار پور وج رہن آلے باقی لوک وی اینہاں دے کول ایتھے چیچہ وطنی چ چک 44 باراں ایل چ آ گئے ۔

واسی[لکھو]

44 باراں ایل لگے اک کھیت

چک 44 باراں ایل دی کمی کڈ کے ساری دی ساری جٹاں تے مشتمل اے ، جہڑے کہ پچھوں دیس چ ضلع ہوشیار پور دیاں تحصیلاں دسوہا ، گڑھ شنکر تے تحصیل ہوشیار پور دے مختلف پنڈاں ، نتھو پور ، متووال ، جھجی پنڈ ، وراں پور ، ڈومانا وغیرہ دے رہن آلے سن تے سن 47ء دے اجاڑےآں تے استوں پہلوں 1910ء دی دہائی چ اس بار دی آبادکاری ویلے ایتھے آکے وس گئے سن ۔

ایتھے جٹاں دیاں گوتاں : دھوتھڑ ، وینس ، سنگھیڑا ، گل ، ریاڑ تے رندھاوا وغیرہ نال تعلق رکھن آلے جٹ وسدے نیں ۔ تے وینساں دی گنتی سبتوں ودھ اے ، ایسے لئی پنڈ نوں کدے کدے 44 باراں ایل وینساں وی آکھ دتا جاندا سی ۔

دھوتھڑ جٹ چک دا اک وڈا تے منیا ہویا ٹبر اے تے پنڈ دے سبتوں پڑھے لکھے تے کاروباری لوکاں چ اینہاں دی گنتی ہندی اے ۔ ایہہ چڑھدے پنجاب دے ضلع ہوشیارپور دی تحصیل دسوہا دے قصبے اُرمُڑ ٹانڈا دے نیڑے بیاس دریا دے کنڈے واقع پنڈ نتھو پور دے رہن آلے سن ، تے بار دی آبادکاری ویلے 1915ء دے لاگے اس ٹبر دا اک حصہ 44 باراں ایل آ گیا تے زمینداری کرن لگا تے سن 47ء چ پنجاب دی ونڈ دے بعد اینہاں دے ٹبر دے باقی لوک وی ایتھے آ گئے ۔ اینہاں نوں دیس دی زمین بدلے زمین دوجی تھاں تے ملی سی پر ایہہ اوتھے نئیں گئے تے چک 44 چ ای موجود زمین نوں آپس چ ونڈ کے ایتھے ای رہ گئے ۔

منے پرمنے لوک[لکھو]

چک 44 باراں ایل دی زمین بوہت زرخیز اے تے ایتھے دے رہن آلے وی اپنیاں صلاحیتاں پاروں دور دور تک مشہور نیں ۔ حالانکہ ایتھے وسن آلے لوکاں دے دادے پڑدادے عام جٹ زمین دار لوک سن تے ہل واہ کے خوش سن تے کوئی ٹانواں ٹانواں بندا ای تھوڑا بوہتا ای پڑھنا جاندا سی ۔ پر اینہاں لوکاں دیاں اگلیاں پیڑھیاں نے پڑھائی دے میدان چ اپنا ناں پیدا کیتا تے ملک دے اعلی ترین ادارےآں چ اچے عہدےآں تک پہنچے ۔

چک 44 باراں ایل دے ایہوجہے سپوتاں چوں کجھ دے بارے جانکاری تھلے دتی گئی اے ۔

ڈاکٹر صابر علی دے والد صوبیدار (ر) محمد طفیل دھوتھڑ نیں ۔ اینہاں نے پنڈ ج رہندے ہوئے ای تعلیم حاصل کیتی تے اپنی قابلیت دے سر تے ای وظیفہ حاصل کر کے برطانوی یونیورسٹی چوں میٹا فزکس چ پی ۔ ایچ ۔ ڈی دی ڈگری حاصل کیتی ۔ تعلیم حاصل کر کے وطن واپس آ کے اوہ پاکستان ایٹامک انرجی کمیشن نال منسلک ہو گئے تے لمبے چر تک کہوٹہ لیبارٹریز چ " پرنسیپل آف سائنس آفس" دے عہدے تے کم کردے رہے ۔ اس دے بعد اینہاں دیاں صلاحیتاں نوں ویکھدے ہوئے اینہاں نوں میانوالی چ چشمہ ایٹمی پاور پلانٹ دی تنصیب دا کم سونپ دتا گیا ۔ اس کم لئی اوہ مشنری تے تربیت لین چین گئے تے واپس پرتنے تے اوہناں نوں ایس پراجیکٹ دا انچارج بنا دتا گیا ۔ اج کل اوہ چچشمہ 2 ایٹمی پاور پلانٹ دی تنصیب ج مصروف نیں ۔

  • ڈاکٹر محمد خالد ریاڑ

ڈاکٹر محمد خالد ریاڑ میو ہسپتال لہور چ اپنے شعبے دے سربراہ نیں تے اوہناں نے امریکہ توں اپنے شعبے چ سپیشلازیشن کیتی ہوئی اے تے اک قابل تے مشہور ڈاکٹر نیں ۔

ڈاکٹر خالد رفیق نے زرعی یونیورسٹی فیصل آباد توں ایگرانومی چ پی ۔ ایچ ۔ ڈی حاصل کیتے تے فیر اوہ محکہ زراعت چ مختلف عہدےآں تے کم کردے رہے ۔ اوہ اج کل ضلع خانیوال چ محکمہ آبپاشی چ ڈی ۔ ڈی ۔ او دے عہدے تے کم کر رہے نیں


  • چوہدری گفتار احمد وینس چیف ایگزیکٹو ، ملتان الیکٹرک سپلائی کمپنی (میپکو)

چوہدری محمد گفتار ، محکمہ واپڈا چ الیکٹریکل انجینئر دے طور تے مختلف اعلی عہدےآن تے کم کردے رہے نیں تے اج کل اوہ میپکو دے چیف نیں ۔


ڈاکٹر محمد افضل 44 باراں ایل دے اک نامور سپوت نیں تے اوہ انتہائی دل آویش شخصیت تے احلاق دے مالک نیں تے لہور چ نواز شریف سوشل سکیوٹی ہسپتال ملتان چونگی چ امراض سینہ دے ڈاکٹر نیں ۔

چوہدری نثار احمد ٹیکسٹائل دے شعبے چ جنرل منیجر دے طور تے کم کر رہے نیں تے مختلف ٹیکسٹائل ملاں چ اوہ خدمات سرانجام دے جکے نیں ۔

  • چوہدری فدا عباس دھوتھڑ ، بی ۔ ایس سی (آنرز) فوڈ ٹیکنالوجی زرعی یونیورسٹی فیصل آباد

چوہدری فدا عباس زرعی یونیورسٹی فیصل آباد توں فوڈ ٹیکنالوجی چ گریجوئیٹ نیں تے اینہاں نے کجھ چر چیچہ وطنی چ پیسی سائیڈ کمپنیاں چ ملازمت کیتی تے اج کل امریکہ دے شہر نیو یارک چ سیٹل نیں ۔

چک 44 باراں ایل دے ہور وی کئی سپوت مخلتف ادارےآں چ اعلی عہدےآں تے کم کر رہے نیں تے دیس دی خدمت سرانجام دے رہے نیں ۔

کم کار[لکھو]

چک دے لوکاں دا آبائی کم تے واہی ویجی دا اے پر جدید تعلیم دیاں سہولتاں ہون پاروں لوکاں دی اک وڈی گنتی تعلیم حاصل کر کے مختلف شہراں چ سرکاری تے پرائیویٹ نوکریاں کر رہی اے ۔ تے کافی لوک شہراں چ اپنا ذاتی کاروبار تے نکیاں صعنتاں لا کے وی اپنا تے دوجے لوکاں نوں روزگار مہیا کر رہے نیں ۔ چک دے لوکاں دی اک قابل ذکر گنتی باہرلے دیساں چ وی کم کر رہی تے قیمتی زرمبادلہ ملک وچ گھل رہی اے

واہی بیجی[لکھو]

44 باراں ایل دا اک نہری کھال

چک 44 باراں ایل تے آلے دوالے دیاں زمیناں بوہت زرخیز نیں تے وڈیاں نہراں پاروں نہری پانی ہون دی وجہ توں ایہہ سونا اگل رہیاں نیں ۔ چک چ رہن آلے بوہتے لوکاں دا کم واہی بیجی ای اے ۔ ایتھے دیاں وڈیاں فصلاں کنک تے کپاہ نیں ۔ پر مکئی ، گنا ، جھونا تے سبزیاں وی کافی رقبے تے کاشت کیتیاں جاندیاں نیں ۔ کجھ گھراں نوں چھڈ کے باقی گھراں کول ، زمیناں دی ونڈ در ونڈ پاروں ہن صرف پنج پنج ، ست ست ایکڑ ای حصے آندے نیں تے نویں پیڑھی دا بوہتا دھیان پڑھائی توں بعد نوکریاں ول ای اے ۔

روحانی شخصیتاں[لکھو]

44 باراں ایل چ کئی روحانی ہستیاں آئیاں تے لوکاں دے دکھ درد وچ اینہاں دے کم آئے ۔ اینہاں وچوں اک پیر سید حفیظ شاہ سن ۔ ایہہ اک درویش کامل سن ۔ آپ اصل وچ ضلع ٹوبہ ٹیک سنگھ وچ ورکاں دے رہن آلے سن پر جوانی چ ای بیوی بچے چھڈ کے سندھ دے ریگستاناں ول چلے گئے سن تے بعد چ پھردے پھراندے چک 44 چ آ گئے تے لوکاں دے دکھ درد ونڈائے ۔ اینہاں دا مزار موضع ورکاں ، ضلع ٹوبہ چ اے ۔ پیر حفیظ شاہ دے بھائی پیر رشید شاہ دا مزار چک 44 باراں ایل اے ۔ ایہہ وی کامل بزرگ سن تے ملتان چ پولیس دی نوکری کردے رہے سن تے "پیر سپاہی" دے ناں نال مشہور سن ۔

سائیں گھسیٹے شاہ : اینہاں دا تعلق چک 44 باراں ایل نال سی تے ذات دے جٹ سن ۔ آپ اکثر اپنے جذب تے مستی چ رہندے سن تے شعر وی کہندے سن ۔ اینہاں دا مزار چک 44 وچ اے تے ایتھے ہر سال 10 اکتوبر نوں میلہ لگدا اے حہڑا کئی دن جارہی رہندا اے ۔ جتھے قوالیاں تے نقلاں ہندیاں نیں تے لوک آلے دوالے دے پنڈاں چوں اینہاں نوں سنن آندے نیں ۔

جدید سہولتاں[لکھو]

چک 44 باراں ایل اک جدید تے تعلیم یافقہ پنڈ اے ۔ پند ول دو پکیاں سڑکاں آندیاں نیں اک چیچہ وطنی ولوں تے دوجی دکھن ول واقع مختلف پنڈاں ولوں تے پنڈ دیاں وذیاں سڑکاں وی پکیاں نیں تے دوجیاں چ سولنگ لگے ہوئے نیں ۔ پنڈ چ سیورج دا بہترین انتظام ای جس پاروں چک دیاں سڑکاں صاف تے خشک نیں ۔ چک 44 باراں ایل چ بجلی اج توں کوئی 40 ، 45 سال پہلے آ گئی سی تے ٹیلی فون دیاں لیناں وی کافی چر توں ایتھے بچھایاں ہویاں نیں ۔ چک چ دو موبائل کمپنیاں دے ٹاور وی لگے ہوئے نیں ۔

چک چ کڑیاں تے منڈےآں دے مڈل تک سکول موجود نیں تے ہن کڑیاں دے سکول نوں ہائی سکول دا درجہ دے دتا گیا اے ۔ پنڈ نوں گیس دین دی وی منظوری ہو چکی اے تے چک دیاں گلیاں چ گیس دے پائپ وی بچھا دتے گئے نیں نے گیس وی چالو ہو گئی اے۔