بابو رجب علی

Babu Rajab Ali بابو رجب علی
[[تصویر: Yaadgaar BABU RAJAB ALI KHAN , Village Sahoke, Moga, Punjab |frameless|alt=|]]
ذا‏تی معلومات
پیدائشی نام	رجب علی
معروفیت	بابو جی، بابو رجب علی
پیدائش	اگست 10, 1894(1894-08-10)ساہوکے ، ضلع فروزپور (ہن: ضلع موگا)، برطانوی پنجاب
وفات	مئی ۶, ۱,۹۷۹(1979-05-06) (عمر 84 سال)چک 32 ضلع اوکاڑا، لہندا پنجاب (پاکستان)
اصناف	پنجابی لوک سنگیت، کویشری
پیشے	گائیک ، کویشر

بابو رجب علی بابو جی دے ناں نال وی جانے جاندے نیں۔ سارے پنجاب تے خاص کر پنجاب دے علاقے مالوے دے اک اگھے پنجابی کویشر سن۔ اوہناں نوں کویشری دا بادشاہ کہیا جاندا اے۔ 6 مئی 1979 نوں چک 32 ضلع اوکاڑا ، لہندے پنجاب وچ فوت ہوئے۔

مڈھلی زندگی

بابو رجب علی دا جم، بطور رجب علی خان، 10 اگست 1894 نوں برطانوی پنجاب دے ضلع فروزپور (ہن ضلع موگا) دے پنڈ ساہوکے وچ ہویا۔ اوہناں دے پیو دا ناں دھمالی خاں تے ماں دا ناں جیونی سی۔ اوہناں دیاں چار بھیناں تے اک چھوٹا بھرا سی۔ بابو رجب علی دے چاچو حاجی رتن وی کویشر سن۔

بابو رجب علی نے نیڑلے پنڈ بمبیہا توں مڈھلی سکھیا حاصل کیتی تے فیر 1912 وچ برجندرا ہائی سکول فریدکوٹ توں دسویں پاس کیتی۔ اوہ چنگے اتھلیٹ تے فٹ بال کھلاڑی سن تے اپنے سکول دی کرکٹ ٹیم دے کپتان وی سن۔ بعد وچ اوہناں نے گجرات ضلعے دے اک انجنیرنگ سکول توں سول انجنیئرنگ کیتی جیہنوں اوس ویلے پنجاب اوورسیئری کہیا جاندا سی تے پنجاب دے محکما نہر وچ اوورسیئر دی نوکری کیتی۔

اوہناں دے چار ویاہ، دولت بی بی، بھاگو بیگم، رحمت بی بی تے فاطمہ نال ہوئے تے ایہناں دے گھر چار پتر، عدالت خان، علی سردار، شمشیر خان تے اکال خان اتے دو دھیاں، شمشاد بیگم تے گلزار بیگم نے جنم لیا۔

بابو جی اپنی پہلی پنجابی شاعری ہیر بابو رجب علی نال کویشری دی دنیا وچ داخل ہوئے تے 1940 وچ اپنی گائیکی نال سمجھوتا نہ کردے ہوئے اپنی نوکری چھڈّ دتی۔

1947 وچ پنجاب دی ونڈ ویلے اپنا پنڈ ساہوکے چھڈ کے لہندے پنجاب (پاکستان) دے اوکاڑا ضلعے وچ آ گئے۔ اوہناں نوں پنجاب دے علاقے مالوے نال بڑا لگاء سی۔ اوہناں نے اپنی پنجابی وچ اپنے پنڈ تے مالوے توں وکھ ہون بارے دکھالا کیتا۔ مارچ 1965 وچ اوہناں نے چڑھدے پنجاب دا گیڑا لایا تے بھاری گنتی وچ اوہناں دے چاہن والے تے کویشر اوہناں نوں مِلن لئی آئے۔

کم

بابو جی پنجابی تے اردو تے کچھ عربی، فارسی تے انگریزی وی جاندے سن پر اوہناں دی شاعری دا صرف پنجابی وچ ہونا پنجاب تے پنجابی نال اوہناں دے پیار نوں ظاہر کردا اے۔

اوہناں نے تقریباً اک درجن قصے اتے کویتاواں لکھیاں۔

خاص طور تے اوہناں ہندو متھہاس جویں کہ رامائن، پورن بھگت تے قولاں، پیغمبر اسلام حضرت محمد ﷺتے لوک نائیکاں جویں کہ امام حسنؑ امام حسینؑ، داؤد بادشاہ اتے سکھ تریخ تے نائکاں جویں گرو ارجن دیو دی شہیدی، ساکہ سرہند، ساکہ چمکور، بدھی چند، بھگت سنگھ تے دلا بھٹی وغیرہ بارے شاعری تے قصے لکھے تے گائے۔ ایس توں علاوا اوہناں نے پنجاب دی تقریبن ہر پریت کہانی بارے شاعری کیتی جیہدے وچ ہیر رانجھا، سوہنی مہینوال تے مرزا صاحباں دے ناں شامل نیں۔

اوہناں نے بہتر کلا چھند ورگے کچھ نویں چھند وی رچے۔ اج وی پنجاب دے بہت کویشر اوہناں دے شاگرد اوہناں دیاں لکھتاں گاؤندے نیں۔

کتاباں

کویشر سکھوندر سنگھ (پکا کلاں) نے اوہناں دی زندگی تے کماں تے سنگم پبلیکیشنز، سمانا راہیں کئی کتاباں چھپوایاں نیں:

• البیلا رجب علی
• انمول رجب علی
• انکھیلا رجب علی
• رنگیلا رجب علی
• انوکھا رجب علی
• دسمیش مہما
• بابو رجب علی دے قصے

ہور دیکھو

• کویشری
• کرنیل سنگھ پارس
• ڈھاڈی
• ہربھجن مان
• کلدیپ مانک

حوالے