طارق عزیز

وکیپیڈیا توں
Jump to navigation Jump to search
طارق عزیز
جنمستھان : ساہیوال, پنجاب
جمن دیہاڑا : 28 اپریل 1936
کم : اداکار، سیاستدان، ٹی وی میزبان
گن : پنجابی شاعر

طارق عزیز اک ٹی وی میزبان، اداکار، نیوزکاسٹر، سیاست دان تے پنجابی دے شاعر نیں۔ 1964 وچ پاکستان وچ ٹیلی ویژن سروس شروع ہوئی تے طارق عزیز پی ٹی وی دے پہلے اناؤنسر بݨے۔

پڑھائی[لکھو]

طارق عزیز نے مُڈھلی تعلیم ساہیوال توں حاصل کتی تے بعد وچ گورنمنٹ کالج ساہیوال وچ داخل ہوئے۔

پیشا ورانہ زندگی[لکھو]

طارق عزیز نے ریڈیو پاکستان لہور توں اپنی پیشہ ورانہ زندگی دا اغاز کیتا۔ جد 1964ء وچ پاکستان ٹیلی ویژن قائم ہویا تاں طارق عزیز پی ٹی وی دے سبھ توں پہلے اناؤنسر بنے فیر 1975 وچ شروع کیتے جاݨ آلے اوہناں دے سٹیج شو نیلام گھر نے اوہناں نوں شہرت دیاں بلندیاں تے پہنچا دتا۔ ایہ پروگرام ہُن تک چل رہیا اے۔ پہلے ایہدا نام نیلام گھر فیر طارق عزیز شو تے بعد وچ بزمِ طارق عزیز رکھ دتا گیا۔ ہُن بزم طارق عزیز دے نام نال اک شو چلا رہے نیں۔ طارق عزیز نے ریڈیو تے ٹی وی پروگراماں توں علاوہ فلماں وچ وی اداکاری کیتی ۔ اوہناں دی سبھ توں پہلی فلم انسانیت (1967 ) سی تے اوہناں دیاں دوجیاں مشہور فلماں سالگرہ، قسم اس وقت کی، کٹاری، چراغ کہاں روشنی کہاں ، ہار گیا انسان نیں۔ اوہناں دی فنی خدمات دے اعتراف وچ حکومتِ پاکستان ولوں اوہناں نوں بہت سارے اعزازات وی مل چکے نیں۔ 1992 وچ تمغا حُسنِ کارکردگی وی ملیا۔

سیاست وچ[لکھو]

طارق عزیز سیاست وچ وی دلچسپی رکھدے نیں۔ طارق عزیز نے کالج دے زمانے وچ ای سیاسی سرگرمیاں وچ حصہ لینا شروع کردتا۔ 1997 وچ پاکستان مسلم لیگ ن ولوں الیکشن جِت کے قومی اسمبلی دے ممبر بن گئے۔ 1999 وچ فوج دے ہتھوں مسلم لیگ (ن) دی حکومت ختم کردتی گئی۔ طارق عزیز نوں سپریم کورٹ دیاں کندھاں ٹپن تے اوہدی توہین کرن دے الزام دا سامنا وی کرنا پیا۔ طارق عزیز دی گھر آلی ہاجرہ طارق 2002 توں 2007 تک مسلم لیگ ق ولوں قومی اسمبلی دی ممبر رہی۔

پنجابی شاعری تے لِکھتاں[لکھو]

طارق عزیز اک ادب تے علم دوست شخصیت نیں۔ اوہناں دا مطالعہ بہت وسیع اے۔ اوہناں دے کالماں دا اک مجموعہ ’’داستان‘‘ دے نام توں تے پنجابی شاعری دا مجموعہ ’’ہمزاد دا دکھ‘‘ چَھپ چکیا اے۔ اوہ اپنی مادری زبان پنجابی وچ شاعری کردے نیں۔

پنجابی غزل

گناہ کیہ اے، ثواب کیہ اے ۔ ۔ ایہہ فیصلے دا عذاب کیہ اے

میں سوچدا واں چونہاں دِناں لئی ۔ ۔ ایہہ خواہشاں دا حساب کیہ اے

جے حرف اوکھے میں پڑھ نئیں سکدا ۔ ۔ تے فیر جگ دی کتاب کیہ اے

ایہہ سارے دھوکھے یقین دے نیں ۔ ۔ نئیں تے شاخ گلاب کیہ اے

ایہہ ساری بستی عذاب وچ اے ۔ ۔ تے حکم عالی جناب کیہ اے


کتاباں[لکھو]

  • ہمزاد دا دکھ