جگا (گیت)

جگّا، پنجابی لوک گیت نیں، جیہڑے پنجاب دے اک لوک کردار جگے جٹ دی تعرِیف وچ گائے جان٘دے نیں۔ جگا جٹ پنجاب دے اوہناں‌ کرداراں‌ وِچوں‌ اک اے جیہڑے پنجابی لوک گِیتاں تے پنجابی لوک داستانّاں دا حِصّہ بَݨ گئے۔ جگّے نُوں پنجاب دا رابن ہڈ کہیا جان٘دا اے۔ جگّا جَٹّ لہندے پنجاب دا اکّ باغی سی جیہنے اپݨے توں‌ طاقتوَر دی طاقت نُوں نئِیں منّیا۔ "جگّا جمّیا" لوک گیت نوں‌ بہت سارے پنجابی گلُوکاراں نے گایا اے۔ شوکت علی، ابرار الحق، گرداس مان تے فضل جٹ دا گایا جگّا سَبھ توں‌ وَدھ مقبُول ہویا اے۔

جگّا جمّیا تے مِݪݨ ودھائِیاں
وڈّا ہویا ڈاکّے ماردا
جگّیا تُر پردیس گئیوں
بُوہا وجّیا
جگّے جَٹّ دے کبُوتر چِینّے
ندِیوں پار چُگدے
جگّیا تُر پردیس گئیوں
بُوہا وجّیا
جگّے مُچّھ نُوں مروڑا دِتا
تے پن٘ڈ دی پنچائِت ٹُٹّ گئی
جگّیا تُر پردیس گئیوں
بُوہا وجّیا
جگّے ماریا لائل پور ڈاکّا
تے تاراں کھڑک گئِیاں
جگّیا جگّیا
تے تُر پردیس گئیوں
وے بُوہا وجّیا
جگّے جَٹّ دا جان٘گِیا
کِلّی اُتے ٹن٘گّیا رہیا
پُورنا نائِیاں وَڈھ چھڈّیا جگّا سُورما
جگّا وڈّھیا بوڑھ دی چھاویں
تے نَو مَݨ ریت بِھجّ گئی
جگّیا اوئے جگّیا
تُر پردیس گئیوں
بُوہا وجّیا
جے مَیں جاݨدی جگّے نے مَر جاݨا
تے اکّ دی تھاں دو جَمّدی
جگّیا اوئے جگّیا
تُر پردیس گئیوں
بُوہا وجّیا

۔ ۔ ۔ ۔ ۔ ۔ ۔

جگّا جمّیا تے مِݪݨ ودھائِیاں
جگّا جمّیا
تے وڈّا ہو کے وَیری ماردا
او جگّیا تُر پردیس گئیوں
وے بُوہا وجّیا
جگّے ماریا لائل پور ڈاکّا
تے تاراں کھڑک گئِیاں
جگّیا جگّیا
تے تُر پردیس گئیوں
وے بُوہا وجّیا
کچّی پُݪی تے لڑائِیاں ہوئِیاں
تے چھوِہیاں تے کِلّ ٹُٹّ گئے
جگّیا جگّیا
تے تُر پردیس گئیوں
وے بُوہا وجّیا
جگّا ماریا بوڑھ دی چھاویں
تے نَو مَݨ ریت بِھجّ گئی
جگّیا جگّیا
تے تُر پردیس گئیوں
وے بُوہا وجّیا
جے مَیں جاݨدی جگّے نے مَر جاݨا
اکّ دی تھاں دو جَمّدی
جگّیا جگّیا
تے تُر پردیس گئیوں
وے بُوہا وجّیا

۔ ۔ ۔ ۔ ۔ ۔ ۔

جگّا جمّیا فجر دی بان٘گّے
لوڈّھے ویلّے کھیڈدا پِھرے
جگّا جمّیا تے مِݪݨ ودھائِیاں
وڈّا ہو کے ڈاکّے ماردا
جگّے ماریا لائل پور ڈاکّا
تاراں کھڑک گئِیاں
کچّے پُݪ تے لڑائِیاں ہوئِیاں
چُھریاں دے گُھنڈ مُڑگئے
جگّے جَٹّ دا جان٘گِیا پَٹ دا
کِلّی اُتے ٹن٘گّیا رہ گیا
پُورنا نائِیاں نے وَڈھ چھڈّیا جگّا سُورما
جگّا وڈّھیا بوڑھ دی چھاویں
نَو مَݨ ریت بِھجّ گئی